इतिहासमा आज : पहिलो मोटरसाइकल, गुडइयर टायर, लिंकन मोटर्स र मापसे जाँचको परीक्षण

अटोमोबाइल इतिहासमा आज अर्थात अगस्त २९ को दिनलाई विशेष मानिन्छ । आजकै दिन विश्वकै पहिलो मोटरसाइकल रेटवागेनको प्याटेन्ट दर्ता भएको थियो । आजभन्दा १३६ वर्षअघि अर्थात २९ अगस्ट १८८५ मा जर्मन नागरिक डेम्लरले काठबाट निर्मित आधुनिक मोटरसाइकलको प्याटेन्ट दर्ता गराएका थिए ।

त्यसैगरी आजकै दिन अमेरिकामा विश्व प्रख्यात गुडइयर टायर उद्योगको स्थापना गरिएको थियो । आज भन्दा १२३ वर्षअघि अर्थात सन् १८९८ मा अमेरिकाको ओहियो राज्यमा फ्रांक सेवरलिंगले यसको सुरुवात गरेका थिए । १३ जना कामदार राखेर सुरुवात गरिएको यो उद्योगले तत्कालीन समयमा मोटरसाइकल र घोडाले तान्ने रथमा प्रयोग हुने टायर उत्पादन गर्ने गथ्र्यो । आजको दिनमा यो विश्वको सर्बाधिक ठूला टायर उद्योगको सूचीमा समावेश छ ।

आजकै दिन अर्थात सन् १९१७ मा प्रख्यात अटोमेकर लिंकन मोटर्सको स्थापना गरिएको थियो । १०४ वर्ष पुरानो यो कम्पनीलाई अमेरिकामा हेनरी लेलान्डले स्थापना गरेका हुन् । सन् १९२२ मा फोर्ड मोटरले यसको स्वामित्व खरिद गरेको थियो ।

६४ वर्षअघि अर्थात सन् १९५७ मा आजकै दिन पहिलो पटक मापसे जाँच गर्ने विधिको परीक्षण गरिएको थियो । ड्रंकोमिटर नाम दिइएको उक्त परीक्षणका क्रममा कसैले मापसे गरेको छ वा छैन अर्थात गरेको छ भने कतिमात्रामा गरेको छ भनेर मापसे गर्नेलाई बेलुनमा फुक्न लगाइन्थ्यो र उक्त स्वाशलाई केमिकल भएको मेसिनमा पठाइन्थ्यो । यसो गर्दा केमिकलको रङ परिवर्तन भए उसले मापसे गरेको ठहरिन्थ्यो । कलर जति गाढा भयो त्यति नै बढी मात्रामा मापसे गरेको बुझिन्थ्यो ।