चितवनमा हुने अटो जिमखाना च्याम्पियनसिपमा २१ ड्राइभर सहभागी हुने निश्चित

चितवन – नासा नेपाल वाग्मती संघ तथा चितवन अटोमोबाइल्स डिलर्स एसोसिएसन (काडा) को संयुक्त आयोजनामा चितवनकै पहिलो रोमान्चक र साहसिक मोटर स्पोर्टस् गेम ‘नेपाल अटो जिमखाना’ आज शुरु हुँदैछ ।

आज र भोलि गरी दुई दिन सम्म चल्ने सो गेममा कुल २१ जनाको सहभागिता निश्चित भएको आयोजकको भनाइ छ ।

शुक्रबार प्राक्टिस र क्लालिफाइङ राउन्ड शुरु भई शनिबार विहानै देखि फाइनल इभेन्टहरु सञ्चालन हुनेछ । विजयीहरुलाई भरतपुर महानगरपालिकाकी मेयर रेणु दाहालद्वारा पुरस्कृत गरिने छ ।

चितवनलाई साहसिक र खेल पर्यटनको मुख्य गन्तव्य बनाउने अभियानमा रहेको भरतपुर महानगरपालिकाको समेत मुख्य सहयोग रहेको सो इभेन्टमा काडा चितवनमा आबद्ध र खेलप्रेमी व्यवसायीहरुको सक्रिय सहयोग प्राप्त भएको बताइएको छ ।

थ्रिल, एड्भेन्चर र स्किलको संयोजनबाट खेलिने अटो जिमखानाका कुल सहभागी २१ मध्ये १४ ड्राइभर चितवन बाहिरका र ७ ड्राइभर चितवन भित्रैका रहेका छन् भने जम्मा २ जना महिला प्रतिस्पर्धी हुनेछन्।

बेष्ट टाइमिङ्गको आधारमा च्याम्पियनसिपका विजेता १ जना तथा महिलाबाट १ जनाले आगामी नोभेम्बरमा चाइनिज ताइपेइमा हुने एसिया प्यासिफिक अटो जिमखाना च्याम्पियनसिपमा सहभागिताको अवसर प्राप्त गर्नेछन्।

त्यसैगरी पहिलो दोश्रो र तेश्रोले क्रमशः २७ हजार ९ हजार र ३ हजार नगद र शिल्ड प्राप्त गर्नेछन् भने सम्पूर्ण सहभागीलाइ प्रमाणपत्र प्रदान गरिनेछ । शुरुवातमा १२०० देखि २ हजार सीसी सम्मको गाडीहरु भनिए पनि प्राविधिक कारणबस एक हजार सीसी माथिका सबै किसिमका गाडीलाई खुल्ला गरिएको छ ।

सो इभेन्टको प्राविधिक कार्यको लागि नासा नेपालका दक्ष मार्शलहरुको सहयोग हुने बताइएको छ ।