आधिकारिक रुपमै नेपाल भित्रिए अउडीका विद्युतीय कार, मूल्य १ करोड ५० लाख सम्म

काठमाडौं – जर्मन बिलासी कार अउडी आधिकारिक रुपमा नेपाली बजारमा भित्रिएको छ । काइरोस इन्टरनेसनलले अउडीका विद्युतीय कार नेपाली बजारमा आधिकारिक रुपमा भित्र्याएको हो ।

हाल कम्पनीले अउडी क्यू फोर ३५ ई–ट्रोनका दुई भेरिएन्ट ई–ट्रोन ३५ र ई–ट्रोन ३५ स्पोर्टब्याक उपलब्ध गराएको छ । यी विद्युतीय कारमा ५५ किलोवाट आवरको लिथियम आयोन ब्याट्री प्याक रहेको छ । सो कारमा रहेको मोटरको पिक पावर १२५ किलोवाट रहेको छ । यसको ग्राउन्ड क्लियरेन्स १८० एमएम छ ।

अउडीको यो कारले एक पटकको फुल चार्जमा ३४९ किलोमिटर रेन्ज दिने डब्लुएलटीपीले प्रमाणित गरेको छ । उत्कृष्ट विशेषतायुक्त सो कारको विश्व स्तरमा समेत निकै नै चर्चा हुने गरेको छ ।

शुरुमा दुई मोडल भित्र्याएको कम्पनीले आगामी दिनमा अन्य मोडल समेत भित्र्याउने बताएको छ । कम्पनीले उच्च स्तरीय सर्भिसका लागि समेत तयारी गरेको बताएको छ ।

अउडी क्यू फोर ३५ ई–ट्रोनको नेपाली बजार मूल्य १ करोड ४५ लाख र अउडी क्यू फोर ३५ ई–ट्रोन स्पोर्टब्याकको मूल्य १ करोड ५० लाख रुपैयाँ तोकेको छ ।

पहिले पनि केही युनिट गाडी नेपाली बजारमा उपलब्ध भइरहे पनि आधिकारिक बिक्रेता थिएन । तर अब भने आधिकारिक बिक्रेतामार्फत औपचारिक रुपमा अउडी ब्रान्ड नेपाल भित्रिएको हो ।