एथर स्कुटरमा अब ८ वर्ष अर्थात ८० हजार किलोमिटर वारेन्टि

विद्युतिय स्कुटर निर्माता एथरले अब आफ्नो ब्याट्री प्याकहरूमा ८ वर्ष अर्थात ८० हजार किलोमिटरको विस्तारित वारेन्टी प्रदान गर्ने भएको छ । कम्पनीका अनुसार यो सुबिधा प्रो प्याक रोज्ने ग्राहकहरूलाई मात्र उपलब्ध हुनेछ ।

हाल उपलब्ध गराउँदै आएको ५ वर्ष अर्थात ६० हजार किलोमिटर वारेन्टीलाई बढाएर ८ वर्ष अर्थात ८० हजार किलोमिटर पुर्याइएको हो । जसका लागि ग्राहकले ५ हजार भारु अतिरिक्त भुक्तानी गर्नुपर्ने जनाइएको छ । प्रो प्याक योजनाले ब्याट्रीको गहिरो डिस्चार्जलाई कभर गर्ने र ८ वर्ष सम्मका लागि ब्याट्री हेल्थ ७० प्रतिशत आश्वासन गर्नेछ ।

इ–स्कुटरको आधारमा प्रो प्याकको लागत रु १३ हजारदेखी २० हजार भारुसम्म कायम गरिएको छ । उक्त प्याकका लागि यसअघि ८ हजारदेखी १५ हजार भारुसम्म भुक्तानी गरेर ५ वर्ष अर्थात ६० हजार किलोमिटर वारेन्टि पाउन सकिन्थ्यो ।

प्रो प्याकले ग्राहकलाई थप राइडिङ मोड, गाइड–मी–होम लाइट, कोस्टिङ रेजेन, नेभिगेसन, चोरी सूचनाहरू, सवारी तथ्याङ्कहरू र अन्तर–शहर पार्किङ जस्ता सुविधाहरूमा पहुँचसमेत दिने जनाइएको छ ।

एथरका स्कुटर नेपाली बजारमा समेत उपलब्ध रहँदै आएको छ । नेपालमा बैद्यज इनर्जीले यो ब्रान्डलाई बिक्री बितरण गर्दै आएकोमा भारतमा जस्तै नेपालमा पनि यसको विस्तारित वारेन्टि सेवा लागु हुने अनुमान गर्न सकिन्छ ।