अशोक लेल्याण्डको नेपाली बजार : साना कमर्सियल देखी डिफेन्स भेइकल सम्मको कारोवार

कमर्सियल भेइकलको उत्पादनमा कहलिएको भारतीय अटो उत्पादक अशोक लेल्याण्ड नेपाल भित्रिएको निकै लामो समय वितिसकेको छ । नेपालमा यो ब्रान्डको आधिकारिक विक्रेता विभिन्न कालखण्डमा परिवर्तन हुँदै विगत ८ वर्षयता आइएमई ग्रुप मातहत आएको छ ।

भारतको दोस्रो ठूलो कमर्सियल भेइकल उत्पादक हिन्दुजा ग्रुप अन्तर्गतको यो ब्रान्ड वलियो, मजवुत र उच्च पर्फमेन्सयुक्त सवारीसाधनको उत्पादनका कारण चर्चामा रहँदै आएको छ । कमर्सियल भेइकल सेग्मेन्टमा प्राय सवैजसो रेन्जका गाडी उत्पादन गर्दै आइरहेको यो ब्रान्डको नेपाली बजारमा अहिले लाइट कमर्सियलदेखी सुरक्षा निकायले प्रयोग गर्ने डिफेन्स भेइकलसम्म उपलब्ध छन् । अशोक लेल्याण्डलाई हेभी ड्युटी भेइकलका रुपमा समेत चिन्ने गरिन्छ ।

कमर्सियल भेइकलमा आफ्नो बजार हिस्सा बढाउँदै लगेको अशोक लेल्याण्डको नेपालमा ठुला मालवाहक ट्रक, ट्रिप्पर, सार्वजनिक यातायातमा प्रयोग हुने ठूलादेखी साना वस, स्कुल वस, साना कमर्सियल भेइकल र डिफेन्स ट्रकहरुको विक्री बढदै गएको छ । यी सवारीसाधनको बिक्री बढ्न थालेसंगै कम्पनीले देशका विभिन्न स्थानहरुमा सर्भिस र स्पेयर पार्टस् सहितको आफ्टर सेल्स सर्भिस नेटवर्क समेत विस्तार गरिरहेको छ ।

नेपाली बजारमा अहिले यो ब्रान्डको लाइट कमर्सियल भेइकलमा दोस्त, ६ देखी १२ चक्कासम्मका ट्रक एवं ट्रक टेलर, ६ देखी १२ चक्कासम्मकै ट्रिप्पर र सानादेखी ठूलो क्षमतासम्मको प्यासेन्जर वस एवं स्कुल वस उपलब्ध छन् । नेपालमा साझा लगायत अन्य थुप्रै यातायात व्यवसायीले यो ब्रान्डको वस संचालन गर्दै आइरहेका छन् भने ढुवानी व्यवसायीको रोजाइमा ट्रक र ट्रिप्पर पर्न सफल छन् । यसैगरी स्कुल वसमा समेत यो ब्रान्डको बजार क्रमिक रुपमा बृद्धि भैरहेको छ ।

यो ब्रान्डको सबैभन्दा राम्रो उपस्थिती डिफेन्स भेइकलमा रहँदै आएको छ । भारतको डिफेन्स क्षेत्रमा सवैभन्दा ठूलो सप्लायर रहेको अशोक लेल्यान्डले नेपाली सुरक्षा निकायमा पनि वलियो पकड कायम राखेको छ । यो ब्रान्डको स्टालियन ट्रकलाई नेपाल आर्मीले ठूलो संख्यामा खरिद गरी प्रयोग गर्दै आइरहेको छ ।