लन्च भयो अप्रिलिया एसएक्सआर १६० जस्तै फिचर तर सस्तो १२५ सीसीको स्कुटर

इटालियन कम्पनी पियाजियोले भारतीय बजारमा नयाँ एसएक्सआर सिरिजको १२५ सीसी म्याक्सी स्कुटर अप्रिलिया एसएक्सआर १२५ लन्च गरेको छ । धेरै पहिले देखि टिजर सार्वजनिक गरिरहेको अप्रिलियाको सो स्कुटर अब भने बजारमा उतारिएको हो ।

हाल ५ हजार भारुमा बुक गर्न सकिने सो स्कुटर आगामी ३० देखि ४० दिन भित्रमा ग्राहकको घरैमा डेलिभरी गरिने बताइएको छ । हाल यसको आधिकारिक वेबसाइटबाट अनलाइन बुकिङ गर्न सकिनुका साथै डिलरसिपको माध्यमबाट पनि बुकिङ गर्न सकिन्छ ।

यो स्कुटर केही समय पहिले लन्च गरिएको १६० सीसी स्कुटर जस्तै देखिन्छ । यसलाई त्यसको १२५ सीसी भर्सन पनि भन्न सकिन्छ । हाल उपलब्ध अप्रिलियाको एसआर १२५ र स्टोर्म १२५ जस्तै यसको इन्जिन छ । यसमा बीएस६ मापदण्डयुक्त सिंगल सिलिन्डर एयरकुल्ड इन्जिन छ, जसले ९.४ बीएचपीको पावर र ९.२ एनएमको टर्क जेनेरेट गर्छ ।

यो स्कुटरमा र्याप अराउन्ड एलईडी हेडल्याम्प, एलईडी टेलल्याम्प, लामो तथा ठूलो र आरामदायी सिट, यूएसबी चार्जिङ पोर्ट, एड्जस्टेबल रियर सस्पेन्सन, सीबीएसका साथ डिस्क ब्रेक र ७ लिटरको इन्धन ट्यांकी उपलब्ध छ । यसमा १४ इन्चको ह्विल दिइएको छ भने चार कलर अप्सनमा उपलब्ध हुनेछ ।

दिल्लीमा यसको एक्स सोरुम मूल्य १ लाख १६ हजार ३ सय भारु छ । एसएक्सआर १६० को तुलनामा यो ११ हजार भारु सस्तो हो ।

नेपाली बजारमा यो स्कुटर आउने केही समय लाग्ने छ । हाल नेपाली बजारमा उपलब्ध अप्रिलिया एसएक्सआर १६० को मूल्य ४ लाख ९ हजार ९ सय रुपैयाँ छ ।