अनुभव श्रेष्ठ बने नेपाली युवा उद्यमी मञ्च काठमाडौंको अध्यक्ष

काठमाडौं – नेपाली युवा उद्यमी मञ्च (एनवाईईएफ) काठमाडौं च्याप्टरको आठौं वार्षिक साधारण सभा तथा नयाँ कार्यसमिति चयन कार्यक्रम सम्पन्न भएको छ । साधारण सभाले अनुभव श्रेष्ठलाई अध्यक्षमा निर्वाचित गर्दै नयाँ कार्यसमितिलाई जिम्मेवारी हस्तान्तरण गरेको छ ।

श्रेष्ठ नेपालको अटोमोबाइल क्षेत्रमा क्रियाशील औद्योगिक घराना लक्ष्मी ग्रुपका निर्देशक समेत हुन् । लक्ष्मी ग्रुप अन्तर्गत अटोमोबाइल सम्बद्ध विभिन्न व्यवसाय रहेको छ । नेपालमा हुन्डाई र एसएमएल इसुजु तथा बीएमडब्लु लगायतका सवारी साधन यही ग्रुप अन्तर्गत बिक्री वितरण भइरहेका छन् । त्यसैगरी कन्फेक्सनरी, प्लाष्टिक, डेरी, इलेक्ट्रोनिक्स र स्टिल लगायतको व्यवसायमा समेत यो ग्रुप क्रियाशील छ ।

पदभार ग्रहणपछि नवनिर्वाचित अध्यक्ष श्रेष्ठले विश्वास, सहकार्य, निरन्तर सिकाइ र साझा उद्देश्यमा आधारित सशक्त तथा एकताबद्ध एनवाईईएफ काठमाडौं निर्माण गर्ने आफ्नो प्रतिबद्धता व्यक्त गरे । उनले एनवाईईएफलाई केवल व्यवसायिक सञ्जालमा सीमित नराखी युवा उद्यमीहरूले मार्गदर्शन, सहकार्य, अवसर तथा अपनत्व महसुस गर्ने साझा मञ्चका रूपमा अझ सशक्त बनाउने लक्ष्य रहेको बताए ।

एनवाईईएफले आफ्नो व्यक्तिगत तथा व्यावसायिक यात्रामा महत्वपूर्ण भूमिका खेलेको उल्लेख गर्दै अध्यक्ष श्रेष्ठले अब यस संस्थालाई नेपालको युवा उद्यमशीलताको भविष्य निर्माण गर्ने अग्रणी संस्थाका रूपमा स्थापित गर्ने प्रतिबद्धता व्यक्त गरे । उनले उद्यमशीलता केवल व्यवसाय सञ्चालन गर्ने माध्यम मात्र नभई रोजगारी सिर्जना, नवप्रवर्तन प्रवद्र्धन, सामाजिक समस्या समाधान तथा नेपालको दीर्घकालीन आर्थिक समृद्धिको प्रमुख आधार भएको उल्लेख गरे ।

साथै उनले, एनवाईईएफ काठमाडौंलाई ज्ञान आदान–प्रदान, मार्गदर्शन जिम्मेवार व्यवसायिक नेतृत्व तथा साझा सफलताको संस्कृतिमा आधारित संस्थाका रूपमा विकास गर्दै राष्ट्रिय तथा अन्तर्राष्ट्रिय साझेदारीलाई थप सुदृढ बनाउने आफ्नो योजना समेत प्रस्तुत गरे ।

कार्यक्रमका प्रमुख अतिथि, प्रतिनिधि सभा सदस्य गणेश पराजुलीले नवनिर्वाचित अध्यक्ष अनुभव श्रेष्ठ तथा सम्पूर्ण कार्यसमितिलाई हार्दिक बधाई तथा सफल कार्यकालको शुभकामना व्यक्त गर्दै, नवप्रवर्तन, रोजगारी सिर्जना तथा निजी क्षेत्रको विस्तारमार्फत नेपालको आर्थिक रूपान्तरणमा युवा उद्यमीहरूको भूमिका अत्यन्त महत्वपूर्ण रहेको उल्लेख गरे । नेपालको जनसांख्यिक लाभलाई आर्थिक समृद्धिमा रूपान्तरण गर्न युवाहरूलाई उद्यमशीलता, नवप्रवर्तन र रोजगारी सिर्जनामा अग्रसर बनाउन आवश्यक रहेको उनको भनाई थियो ।

कार्यक्रमका विशिष्ट अतिथि, नेपाल उद्योग वाणिज्य महासंघका अध्यक्ष अञ्जन श्रेष्ठले नेपालको आर्थिक भविष्य निर्माणमा युवा उद्यमीहरूको असाधारण सम्भावना रहेको उल्लेख गरे । उनले नेपाली युवामा रहेको सिर्जनशीलता, प्रविधिमैत्री सोच, विश्वव्यापी दृष्टिकोण तथा जोखिम उठाउने क्षमता नेपालको आर्थिक रूपान्तरणका लागि महत्वपूर्ण पूँजी भएको बताए । एनवाईईएफजस्ता संस्थाले भावी व्यवसायिक नेतृत्व विकास, उद्यमशील सोचको विस्तार, नवप्रवर्तन प्रवद्र्धन तथा स्टार्टअप इकोसिस्टम सुदृढीकरणमा महत्वपूर्ण भूमिका निर्वाह गरिरहेको उल्लेख गर्दै श्रेष्ठले, महासंघले युवा उद्यमशीलता प्रवद्र्धन, नवप्रवर्तन, वित्तीय पहुँच, मार्गदर्शन तथा व्यवसायिक सञ्जाल विस्तारका क्षेत्रमा एनवाईईएफसँग सहकार्यलाई अझ सुदृढ बनाउनुपर्नेमा जोड दिए ।

साधारण सभामा उद्यमशीलता विकास, स्टार्टअप प्रवद्र्धन, नवप्रवर्तन, नेतृत्व विकास तथा निजी क्षेत्र र नीति निर्माताबीचको सहकार्यलाई अझ प्रभावकारी बनाउने विषयमा पनि सार्थक छलफल भएको थियो ।

नवगठित कार्यसमितिमा निवर्तमान अध्यक्ष अप्पा शेर्पा, प्रथम उपाध्यक्ष सन्दिप शर्मा, द्वितीय उपाध्यक्ष सौरभ श्रेष्ठ र कार्यसमिति सदस्यहरुमा सायन प्रजापती, सन्तोष पाण्डे, आश्लेषा कार्की, छेची शेर्पा, सरक्षा अधिकारी, इच्छा मल्ल, अमृताञ्जली शाक्य, निखिल अग्रवाल, श्रेया गिरी, श्यारोन अधिकारी र प्रयान्शी जालान रहेका छन् ।

नवनिर्वाचित कार्यसमितिले आगामी कार्यकालमा युवा उद्यमशीलता प्रवद्र्धन, नवप्रवर्तनको विकास, जिम्मेवार व्यवसायिक नेतृत्वको प्रवद्र्धन तथा नेपालभरका युवा उद्यमीका लागि थप अवसर सिर्जना गर्ने दिशामा सक्रियतापूर्वक काम गर्ने जनाएको छ । अध्यक्ष अनुभव श्रेष्ठको नेतृत्वमा एनवाईईएफ काठमाडौंले युवा उद्यमीहरूको अग्रणी मञ्चका रूपमा आफ्नो भूमिका अझ सुदृढ गर्दै उत्कृष्ट नेतृत्व विकास, उद्यमशीलताको प्रवद्र्धन तथा नेपालको आर्थिक र सामाजिक रूपान्तरणमा अर्थपूर्ण योगदान पु-याउने विश्वास व्यक्त गरिएको छ ।