एसटीसी अटो सोलुसनले अब एम्पियर ब्रान्डका इलेक्ट्रिक स्कुटर बिक्री गर्ने

काठमाडौं – भारतमा उत्पादन भएको उच्च स्तरिय विद्युतीय स्कुटर ब्रान्ड एम्पियर अब एसटीसी अटो सोलुसनले बिक्री–वितरण गर्न थालेको छ । भारतमा १४ वर्षको इन्जिनियरिङ अनुभव भएको ग्रिभ्स इलेक्ट्रिक मोबिलिटीले उत्पादन गरेका एम्पियर ब्रान्डका स्कुटरको आधिकारीक रुपमा एसटीसी ग्रुप अन्तर्गतको एसटीसी अटो सोलुसन प्रालिले ल्याएको हो ।

एसटीसी अटो सोलुसन प्रालि अब एम्पियरका दुई मोडलका स्कुटरसहित नेपाली बजारमा प्रवेश गरेको छ ।

ग्रिभ्स इलेक्ट्रिक मोबिलिटीले बिगत १७ वर्षदेखि भारतमा विद्युतीय दुई पांग्रे सवारी साधन उत्पादन गर्दै आएको र यो भारतमा टप ६ ब्रान्डको रूपमा आफ्नो बलियो उपस्थिति जनाइरहेको ब्रान्ड हो ।

एम्पियरका स्कुटरहरुमा लिथियम फेरो फोस्फेट अर्थात एलएफपी ब्याट्री प्रयोग भएका छन् । यी स्कुटरहरु अत्यन्तै चिसो अर्थात माइनस ४० डिग्री र तातो अर्थात ६० डिग्रीमा परीक्षण भएका छन् । एम्पियरमा प्रयोग भएका लिथियम फेरो फास्ट ब्याट्रीको लाइफ साइकल हजारसम्म रहेका छन् । यी ब्याट्रीमा ७५ हजार किलोमिटर वा ५ वर्षसम्मको वारेन्टी रहने छ । एम्पियरका स्कुटरहरुमा मजबुत च्यासिस, ट्विन सस्पेन्सन, स्मार्ट टेक्नोलोजीहरु प्रयोग भएका छन् ।

नेपाली बजारमा हाल दुई मोडल एम्पियनर म्याग्नस नियो र एम्पियर नेक्सस स्कुटर उपलब्ध भएका छन् ।

एम्पियर म्याग्नस नियोेमा २.५ किलोवाट क्षमताको मोटर उपलब्ध छ। यो स्कुटरमा २.३ किलोवाट ब्याट्री प्याक उपलब्ध रहेको छ भने यसलाई एक पटक फुलचार्ज गरेर १०० किलोमिटरसम्म गुडाउन सकिने दावी गरिएको छ ।

यो स्कुटरमा आरामदायी सिटका साथै १५० किलो लोडिङ क्षमता र १६५ एमएमको ग्राउन्ड क्लियरेन्स तथा लो, हाई र रिभर्स राइडिङ मोड उपलब्ध छ। यसको मूल्य ३ लाख रुपैयाँ कायम गरिएको छ।

नेक्ससमा ३.१८ किलोवाट क्षमताको मोटर उपलब्ध छ । यसमा ३ किलोवाट आवरको एलएफपी ब्याट्री उपलब्ध छ उसलाई पटक फुलचार्ज गरेर १०७ किलोमिटरसम्म गुडाउन सकिने कम्पनीको दावी छ । यो ब्याट्री प्याकलाई घरमै ३ घन्टा ३० मिनेट चार्ज गर्न सकिन्छ ।

मिड माउन्ट मोटर भएको यो स्कुटरमा रिभर्स सहित पाँच राइड मोड उपलब्ध छन् । यसमा अलोय ह्विल, डिस्क एलईडी लाइट, यूएसबी चार्जर, कनेक्टिभिटी जस्ता फिचर्स पाउन सकिन्छ । यसको मूल्य ३ लाख ३५ हजार रुपैयाँ तोकिएको छ ।

एसटीसी अटो सोलुसन प्रालि एसटीसी ग्रुप अन्तर्गतको कम्पनी हो । एसटीसी ग्रुप हाल नाडा अटोमोबाइल्स एसोसिएसन अफ नेपालका अध्यक्ष रहेका सुरेश उप्रेतीको नेतृत्वमो संचालित ग्रुप हो । एसटीसी ग्रुपले पहिले देखि नै नेपाली बजारमा ईएनआई लुब्रिकेन्ट र सिएट टायरका साथै भेरोक, निप्पोन, रकम्यान, युक्याल, एएसके, एफसीसी, प्रिकोल, लुम्याक्स, केजी बेयरिङ, इन्डुरेन्स, हिटाची ब्याट्री, जिन्बेई, एसएफएन लगायत विभिन्न ब्रान्डका पार्ट्स र एसेसरिज समेत बिक्री–वितरण गरिरहेको छ ।