चिनियाँ ईभीको अमेरिका प्रवेश समाप्त हुँदै, ४ गुणा कर बृद्धि गर्ने तयारी

अमेरिकाले चिनियाँ ईभीमा ४ गुणा कर बृद्धि गर्ने तयारी गरेको छ । सस्ता चिनियाँ ईभीले अमेरिकी अटो निर्मातालाई सास्यामा पारेको भन्दै बाइडेन प्रशासनले यो निर्णय लिन लागेको अमेरिकी समाचार संस्थाहरुले जनाएका छन् ।

ईभीमा अहिले लाग्दै आएको २५ प्रतिशत भन्सार शुल्क बढेर १०० प्रतिशत सम्म पुग्न सक्ने मिडिया रिपोर्टमा उल्लेख गरिएको छ । कर बृद्धिको घोषणा यसै हप्ता हुनसक्ने अनुमान गरिएको छ ।

ईभी बाहेक सेमिकन्डक्टर, स्टिल, एल्मुनियम, सोलार प्यानल लगायतका चिनियाँ उत्पादनमा समेत कर बढ्न सक्ने अनुमान गरिएको छ । यसरी कर बृद्धि गरिए चिनियाँ ईभीको अमेरिका प्रवेश लगभग समाप्त हुनेछ ।

अमेरिकाले चिनमाथी आन्तरिक रुपमा यस्ता उद्योगहरुलाई ठुलो अनुदान दिएर सस्तोमा उत्पादन गरी विश्व बजार कब्जा गर्ने रणनीति अख्तियार गरेको भन्दै अरोप लगाउँदै आएको छ ।