सीट्रोन ईसी–३ ‘भ्यालु फर मनी’ गाडी हो : अजय श्रेष्ठ

सरकारले विद्युतीय गाडीमा लाग्ने कर घटाएसंगै नेपालमा विद्युतीय गाडी किन्नेहरुको संख्या दिनानुदिन बढिरहेको छ । अहिले बजारमा १५ लाखदेखि २ करोड ५० लाखसम्मका विद्युतीय गाडीहरु उपलब्ध छन् । यसै सन्दर्भमा श्री सिद्धी इन्टरप्राइजेज र जेएस युनिफर्मका सञ्चालक अजय श्रेष्ठले पनि भर्खरै सिट्रोनको ईसि–३ खरिद गरेका गरेका छन् ।

फ्रेन्च अटो निर्माता सिट्रोनले भारतमा उत्पादन गरेको सो कारको भित्री र बाहिरी दुबै लुक्सले आफूलाई आकर्षित गरेका कारण ईसी–३ खरिद गरेको उनले बताए । ‘यो कार प्रिमियम देखिनुको साथै गाडीभित्र स्पेस पनि फराकिलो छ । साथै यसको ग्राउन्ड क्लियरेन्स पनि एकदमै राम्रो पाँए । मेरो आफ्नो बजेट अनुसारको प्रिमियम गाडी भएका कारण मैले ईसी–३ नै रोजेको हुँ’ उनले भने–‘यसको एसयुभी लुक्स र आरामदायी सिट तथा सुविधासम्पन्न इन्फोटेन्मेन्ट सिस्टमले पनि मलाई यो कारमा आकर्षित गरेको हो ।’

यो कार चलाउन धेरै स्मुथ रहेको र ह्यान्डलिङ पनि धेरै सजिलो र आरामदायक रहेको उनको भनाई छ । ‘अटोमेटिक भएकाले ड्राइभ गर्न पनि सिट्रोन इसि–३ निकै सहज छ । यसको पर्फमेन्स र टर्क जेनेरेसन पनि धेरै राम्रो छ । फ्रेन्च डीएनए भएको यो कारले आकर्षक बजेटमा विश्वासिलो र लक्जरी ड्राइभिङ अनुभव प्रदान गर्दछ । सिट्रोन ईसी–३ भ्यालु फर मनी गाडी हो’ उनले भने ।

कारको ड्राइभिङ र ह्यान्डलिङ धेरै सजिलो भएपनि रेन्ज भने कम्पनीले दावी गरेअनुसार नपाएको उनले गुनासो छ । श्रेष्ठका अनुसार यसले सिंगल चार्जमा २३० देखी २६० किलोमिटरसम्म दिँदै आएको छ । जसबाट आँफू सन्तुष्ट रहेको समेत उनले बताए ।

‘सिट बेल्ट नबाँधेसम्म र सबै ढोकाहरू राम्ररी बन्द नगरेसम्म यो गाडी अगाडी नै बढ्दैन । जुन सुरक्षाको हिसाबले एकदमै राम्रो हो । त्यस्तै यसको सिग्नल र वार्निङहरु पनि एकदम स्पष्ट छ’ उनले भने ।

यअसघि पेट्रोल गाडी चलाउँदै आएका उनले यो गाडी प्रयोग गर्न थालेपछि भने मर्मतसम्भार र संचालन खर्च पुरै बचत हुने गरेको बताए । ‘ईसी–३ प्रयोग गर्न थालेपछि मैले खर्चमा धेरै ठुलो भिन्नता पाएको छु । पेट्रोलको खर्च त यसै पनि बचत हुनै नै भइहाल्यो । यो कारमा लगभग ९ हजार किलोमिटर यात्रा गर्दा मर्मतमा अहिलेसम्म कुनै रकम खर्च गर्नुपरेको छैन’ उनले भने ।

ईसी–३ मा आफूले दैनिक १०० किलोमिटर हाराहारी यात्रा गर्ने गरेको उनको भनाई छ । यति यात्रा गर्दा पेट्रोल गाडीमा इन्धन बापतन ३० हजार हाराहारी खर्च हुने गरेकोमा अहिले गाडी चार्ज गर्न जम्मा मासिक ३ हजार हाराहारीमत्र खर्च हुने गरेको उनको अनुभव छ ।