एइटोको नयाँ एसयूभी एइटो एम८ ईआरईभी अप्रिलमा लन्च हुँदै, प्रि-सेल अर्डर ७० हजार युनिट

चिनियाँ कार निर्माता कम्पनी एइटोले आफ्नो नयाँ एइटो एम८ ईआरईभी एसयूभी अप्रिलमा लन्च गर्ने तयारी गरेको छ । यद्यपि लन्चिङ अघि नै सो गाडीको प्रि-सेल अर्डर ७० हजार युनिट नाघिसकेको छ, जसको मूल्य ३ लाख ६८ हजार देखि ४ लाख ५८ हजार युआन सम्म रहेको छ ।

एइटो एम८ ईआरईभी एसयूभीको लोकप्रियता यसको प्रि-सेलबाट अनुमान गर्न सकिन्छ । विगतको तथ्याङ्क हेर्दा प्रि-सेल सुरु भएको एक घण्टा भित्र अर्डरको सङ्ख्या ७ हजार ५०० युनिट नाघेको थियो, त्यसपछि ६ घण्टा भित्र २१ हजार युनिट नाघेको थियो र १२ घण्टा भित्र २८ हजार युनिट पुगेको थियो ।

एइटो एम८ कम्पनीको चौथो मोडल हो । यसअघि कम्पनीले मिड साइजमा एम५, मिड टु लार्जमा एम७ र लार्ज एसयूभीमा एम९ पेश गरिसकेको छ । एइटो एम८ मिड टु लार्ज एसयूभीको रुपमा बजारमा आउनेछ । यसको लम्बाइ ५१९० एमएम, चौडाइ १९९९ एमएम, उचाइ १७९५ एमएम र ह्विलबेस ३१०५ रहेको छ ।

एइटो एम८ ईआरईभी एसयूभीमा १.५ लिटर टर्बोचार्ज्ड पेट्रोल इन्जिन दिइएको छ, जसले १५८ एचपीमा ११८ किलोवाट पावर जेनेरेट गर्छ । यसको फ्रन्ट इलेक्ट्रिक मोटरले २२१ एचपीमा १६५ किलोवाट र रियर इलेक्ट्रिक मोटरले ३०४ एचपीमा २२७ किलोवाट पावर जेनेरेट गर्छ । यसको अधिकतम गति २०० किलोमिटर प्रति घण्टा छ।

यसमा ५१.९७५ किलोवाटको लिथियम आइरन फस्फेट र ३६.०१९ किलोवाटको टर्नरी लिथियम ब्याट्री गरी दुई प्रकारको ब्याट्री रहेको छ, जसले क्रमशः ३१० किलोमिटर र २०१ किलोमिटर रेन्ज प्रदान गर्छ। यसले फुल चार्ज र फुल ट्याङकिमा १,५२६ किलोमिटर  रेन्ज प्रदान गर्छ ।

एइटो एम८ले आफ्नो ८००भी हाई-भोल्टेज चार्जिङ प्रविधि मार्फत ५ मिनेट चार्जमा १५० किलोमिटर रेन्ज प्रदान गर्न सक्छ।