‘जेनजी’ आन्दोलनमा जलेको एवोनको थापाथली सोरुम पुनः सञ्चालनमा

काठमाडौं–गत भदौ २४ गते ‘जेनजी’ आन्दोलनका क्रममा जलेको थापाथलीस्थिते एवोनको सोरुम पुनः सञ्चालनमा आएको छ । सीजी मोटर्सले काठमाडौंको थापाथलीमा आयोनको फ्ल्यागसिप सोरुम पुनः सञ्चालनमा ल्याएको हो ।

नयाँ सोरुमको उद्घाटन सीजी कर्प ग्लोबलका प्रबन्ध निर्देशक निर्वाण चौधरी र जीएसी इन्टरनेसनल र जीएसी एवोनका प्रतिनिधि रेमन वाङले संयुक्त रूपमा गरेका हुन् । कार्यक्रममा कम्पनीले यो केवल सोरुम उद्घाटन मात्र नभई नेपालमा आधुनिक विद्युतीय यातायातको नयाँ अध्याय सुरु भएको जनाएको छ ।

सीजी मोटर्सका अनुसार, एवोन फ्ल्यागसिप सोरुममार्फत कम्पनीले नेपालमा तीव्र गतिमा विस्तार भइरहेको ईभी बजारमा आफ्नो उपस्थिति अझ मजबुत बनाउने लक्ष्य राखेको छ । ग्राहकलाई अत्याधुनिक विद्युतीय सवारी, प्रिमियम ब्रान्ड अनुभव, उत्कृष्ट बिक्रीपछिको सेवा तथा भरपर्दो चार्जिङ सपोर्ट उपलब्ध गराउने उद्देश्य कम्पनीको रहेको छ ।

अन्तर्राष्ट्रिय बजारमा लोकप्रियता हासिल गरिसकेका एवोन एसयूभी मोडेल केही समयदेखि नेपाली बजारमा उपलब्ध छन् । आधुनिक डिजाइन, उन्नत सुरक्षा प्रविधि तथा आरामदायी सुविधाका कारण यी मोडेल नेपाली ग्राहकबीच लोकप्रिय बन्दै गएको कम्पनीले जनाएको छ ।

एवोन भीलाई प्रिमियम तथा शक्तिशाली इलेक्ट्रिक एसयूभीका रूपमा बजारमा प्रस्तुत गरिएको छ । यसमा ७५.३ किलोवाट आवर क्षमताको ब्याट्री जडान गरिएको छ । जसले लक्जरी भेरियन्टमा ६५० किलोमिटरसम्मको एनईडीसी ड्राइभिङ रेन्ज प्रदान गर्ने कम्पनीको दाबी छ । साथै, यसमा एकसय किलोवाट मोटर, २४० एनएम अधिकतम टर्क तथा १८५ एमएम ग्राउन्ड क्लियरेन्स उपलब्ध रहेको छ, जसले सहरी तथा लामो दुरीको यात्रालाई सहज बनाउने बताइएको छ ।

त्यसैगरी एवोन वाईलाई पारिवारिक प्रयोगका लागि उपयुक्त, स्टाइलिस तथा सहज इलेक्ट्रिक गाडीका रूपमा प्रस्तुत गरिएको छ । कम्पनीका अनुसार, एआईओएन वाई र एआईओएन भी दुवैले जीएसी मोटरको उन्नत ईभी प्रविधि, लामो ड्राइभिङ रेन्ज, आरामदायी डिजाइन तथा सुरक्षाप्रतिको प्रतिबद्धतालाई प्रतिनिधित्व गर्छन् ।

सीजी मोटर्सले हाल नेपालभर २६० भन्दा बढी स्थानमा चार्जिङ सेवा उपलब्ध गराउँदै आएको जनाएको छ । कम्पनीले आगामी दिनमा चार्जिङ नेटवर्कलाई थप विस्तार गर्ने योजना समेत सार्वजनिक गरेको छ ।