आजदेखि अग्रिम टिकट बुकिङ खुला

काठमाडौँ - आजदेखि अग्रिम टिकट बुकिङ खुलेसँगै नयाँ बसपार्कमा बिहानैदेखि टिकट लिने यात्रीको घुइँचो लागेको छ । लामो तथा मध्यम दूरीका सवारीसाधनको टिकट लिने यात्रीको त्यहाँ घुइँचो लागेको हो ।

नेपाल यातायात व्यवसायी राष्ट्रिय महासङ्घका अध्यक्ष पुन्यप्रसाद सिटौलाका अनुुसार देशभरका सबै क्षेत्रमा जाने लामो तथा मध्यम दूरीका सार्वजनिक यातायातको अग्रिम टिकट बुकिङ खुला गरिएको हो ।

यातायात व्यवस्था विभाग, नेपाल प्रहरी र यातायात व्यवसायी तथा मजदुरबीच गत मङ्गलबार चाडपर्वलक्षित यातायात सेवाका लागि अग्रिम टिकट बुकिङ खुला गर्ने निर्णय भएको थियो ।

प्रहरीले आधिकारिक काउन्टरबाट मात्रै टिकट लिन आग्रह गरेको छ । अपरिचित व्यक्ति वा अनाधिकृत एजेन्टबाट नभई बसपार्कभित्र वा सम्बन्धित यातायात कम्पनीका अधिकृत र चिनिने काउन्टरबाट मात्रै टिकट लिन यातायात व्यवसायी राष्ट्रिय महासंघले पनि यात्रुहरुलाई आग्रह गरेको छ ।

साथै टिकट दिने व्यक्तिको नाम र सम्पर्क नम्बर राख्न भनिएको छ । टिकट बेच्ने कर्मचारीले अनिवार्य रूपमा परिचयपत्र र सम्बन्धित यातायात कम्पनीको युनिफर्म लगाएको हुनुपर्नेछ । सरकारले तोकेकोभन्दा बढी भाडा नलिन पनि महासंघले व्यवसायीहरुलाई आग्रह गरेको छ ।

सुरक्षा दृष्टिकोणले महिला यात्रुहरूलाई चालकको छेउको क्याबिनेमा नराखी चालकभन्दा पछाडिको सुरक्षित सिटमा बस्ने व्यवस्था मिलाउन यातायात व्यवसायी महासंघले गाडी चालकलाई आग्रह गरेको छ ।

लामो दूरीका गाडीमा सुरक्षाका लागि अनिवार्य रूपमा दुई जना चालक हुनुपर्नेछ । गाडीको क्षमताभन्दा बढी यात्रु नराख्न तथा प्राविधिक अवस्था जाँच गरेर मात्रै गाडी सञ्चालन गर्न पनि सरकारले यातायात व्यवसायीलाई आग्रह गरेको छ ।

ट्राफिक प्रहरीले काठमाण्डौ उपत्यकाका विभिन्न १५ ठाउँमा यात्रु सहायता कक्ष सञ्चालनमा ल्याएको छ । यस्तै पर्सि आइतबार घटस्थापनादेखि पूर्णिमासम्मका लागि रुट परमिट खुला गरिएको छ । नारायणगढ–मुग्लिन सडकखण्डमा घटस्थापनादेखि अत्यावश्यक वस्तु बोकेका बाहेक अन्य मालवाहक गाडी सञ्चालनमा रोक लगाइएको छ ।