अटो मेकानिक्स व्यवसायी संघद्वारा थप २५ थान सिलिन्डर हस्तान्तरण

काठमाडौं – नेपाल अटो मेकानिक्स व्यवसायी संघले २५ थान अक्सिजन सिलिन्डर चन्द्रागिरी नगरपालिकाका नगर प्रमुख घनश्याम गिरीलाई हस्तान्तरण गरेको छ । संघले शनिबार काठमाडौंको डुंगाअड्डा देखि बाणभञ्ज्याङ सम्मका अटो वर्कशपहरुसँग समन्वय गरी ती सिलिन्डर संकलन गरेको हो ।

संघका अध्यक्ष ठाकुरप्रसाद न्यौपानेको नेतृत्वमा ती सामग्री हस्तान्तरण गरिएको हो । ती सिलिन्डर थानकोट प्राथमिक अस्पतालमा भण्डारण गरी बन्दै गरेका कोभिड होल्डिङ र आइसोलेसन सेन्टरहरुमा उपलब्ध गराइने बताइएको छ ।

सिलिन्डर संकलन कार्यमा संघका सल्लाहकार उदयप्रसाद भण्डारी, चन्द्रागिरी नगर उद्योग वाणिज्य संघका उपाध्यक्ष सुनिल रिजाल, पुरुषोतम रिजाल आदिको सक्रिय सहभागिता रहेको बताइएको छ ।

यो भन्दा पहिले शुक्रबार पनि संघले विभिन्न स्थानमा सिलिन्डर संकलन गरी हस्तान्तरण कार्य सम्पन्न गरेको थियो ।