यूएईमा भीषण सडक दुर्घटना, १४ जनाको मृत्यु

काठमाडौं–संयुक्त अरब इमिरेट्स (यूएई) को फुजैराहमा २३ वटा सवारीसाधन एकआपसमा ठोक्किँदा १४ जनाको मृत्यु भएको छ भने ३० जना घाइते भएका छन् ।

यूएईको आन्तरिक मन्त्रालयका अनुसार बुधबार मध्यरातअघि फुजैराह प्रवेश गर्ने क्षेत्रमा रहेको शेख खलिफा बिन जायद सडकमा दुर्घटना भएको हो । दुर्घटनामा १८ वटा कार र ५ वटा ट्रक संलग्न थिए ।

प्रारम्भिक जानकारीअनुसार एउटा ट्रकका चालकले सवारीसाधन नियन्त्रण गुमाउँदा अर्को गाडीसँग ठोक्किएको थियो। त्यसपछि ट्रक अनियन्त्रित भई सडकमा ट्राफिक जामका कारण रोकिएका अन्य सवारीसाधनमा ठोक्किएको थियो ।

ठक्करपछि ट्रकमा आगलागी भएको र आगो अन्य सवारीसाधनमा समेत फैलिएको थियो । जसका कारण ठूलो मानवीय क्षति भएको प्रहरीले जनाएको छ ।

दुर्घटनामा घाइते भएका ३० जनामध्ये १५ जना उपचारपछि अस्पतालबाट डिस्चार्ज भएका छन् भने बाँकी १५ जनाको अस्पतालमा उपचार भइरहेको छ ।

मृत्यु हुनेमा यूएईका नागरिकसहित अन्य देशका नागरिक पनि रहेको बताइएको छ । मृतकको पहिचान खुलाउन डीएनए परीक्षण भइरहेको छ । घाइते हुनेमा यूएई, ओमान, भारत, ब्राजिल, पाकिस्तान, जोर्डन र इजिप्टका नागरिक रहेका छन् ।