बीवाईडीमा १० लाखभन्दा बढी कर्मचारी : टोयोटा, जीएम, फोर्ड र टेस्लाको संयुक्त संख्याभन्दा धेरै

चिनियाँ विद्युतीय सवारी निर्माता कम्पनी बीवाईडीमा कर्मचारीको संख्या १० लाख २० हजारभन्दा बढी पुगेको छ। कम्पनीका अध्यक्ष वाङ चुआनफुले चीन सोसाइटी अफ अटोमोटिभ इन्जिनियर्स (सीएसएई) को ३३औँ वार्षिक सम्मेलनमा यस्तो जानकारी दिएका हुन्। यो संख्या टोयोटा, जनरल मोटर्स (जीएम), फोर्ड र टेस्लामा कार्यरत कर्मचारीको कुल संख्याभन्दा पनि बढी हो।

सन् २०२५ को अन्त्यमा बीवाईडीमा करिब ८ लाख ६९ हजार ६०० कर्मचारी थिए। त्यसयता १० महिनाको अवधिमा कम्पनीले करिब १ लाख ५० हजार नयाँ कर्मचारी थपेको देखिन्छ। उल्लेखनीय कुरा के छ भने यही अवधिमा कम्पनीको सवारी बिक्री भने घटिरहेको छ।

वाङका अनुसार बीवाईडीका करिब ९ लाख ६० हजार कर्मचारी चीनमा र ६० हजार विदेशमा कार्यरत छन्। कम्पनीका १ लाख २० हजारसम्म कर्मचारी अनुसन्धान तथा विकास (आरएन्डडी) क्षेत्रमा संलग्न छन्। उनीहरूले ब्याट्री सेल, मोटर, इलेक्ट्रोनिक कन्ट्रोल सिस्टम तथा सेमिकन्डक्टर प्रविधिमा काम गरिरहेका छन्।

वाङले कम्पनीको ठूलो जनशक्तिको आधार ठाडो एकीकरण (भर्टिकल इन्टिग्रेसन) लाई मानेका छन्। ब्याट्री, चिप र मोटरजस्ता महत्त्वपूर्ण पार्टपुर्जा आफ्नै कम्पनीभित्र उत्पादन गर्ने रणनीतिले बीवाईडीलाई सन् १९९४ मा ब्याट्री निर्माता कम्पनीका रूपमा सुरु भएको अवस्थाबाट विश्वकै अग्रणी नयाँ ऊर्जा सवारी ब्रान्ड बन्न सहयोग गरेको उनको भनाइ छ।

बीवाईडीको कर्मचारी संख्या पछिल्ला वर्षमा निकै उतारचढावपूर्ण देखिएको छ। सन् २०२२ को अन्त्यमा कम्पनीमा करिब ५ लाख ७० हजार १०० कर्मचारी थिए। सन् २०२३ मा यो संख्या बढेर ७ लाख ३ हजार ५०० पुग्यो। त्यसपछि कम्पनीले तीव्र रूपमा कर्मचारी थप्दै सन् २०२४ को अन्त्यसम्ममा ९ लाख ६८ हजार ९०० पुर्‍याएको थियो।

तर, सन् २०२५ मा कम्पनीले करिब ९९ हजार कर्मचारी कटौती गरेको थियो। विशेषगरी उत्पादन क्षेत्रमा कार्यरत कर्मचारीको संख्या घटाइएको थियो। अहिले भने कम्पनीको जनशक्ति पुनः १० लाखभन्दा माथि पुगेको छ। एसएन्डपी ग्लोबल मार्केट इन्टेलिजेन्सका अनुसार सन् २०२६ जुनको अन्त्यमा बीवाईडीमा ९ लाख ११ हजार ९०० कर्मचारी थिए। त्यसयता करिब चार महिनामै १ लाखभन्दा बढी कर्मचारी थपिएका छन्।

अन्य ठूला सवारी निर्मातासँग तुलना गर्दा बीवाईडीको कर्मचारी संख्या निकै ठूलो देखिन्छ। सन् २०२५ को अन्त्यमा फक्सवागन ग्रुपमा ६ लाख ६२ हजार ९४२, स्टेलान्टिसमा २ लाख ५८ हजार ६६८ र फोर्डमा १ लाख ६९ हजार कर्मचारी थिए। टोयोटामा सन् २०२६ मार्च ३१ सम्म ३ लाख ९० हजार ९२७ तथा जीएममा सन् २०२५ को अन्त्यमा १ लाख ५६ हजार कर्मचारी थिए। टेस्लामा भने पछिल्लो विवरणअनुसार विश्वभर १ लाख ३४ हजार ७८५ कर्मचारी छन्।

टोयोटा, जीएम, फोर्ड र टेस्लाको कुल कर्मचारी संख्या करिब ८ लाख ५१ हजार हुन्छ। यस आधारमा बीवाईडीमा ती चार कम्पनीको संयुक्त संख्याभन्दा करिब १ लाख ७० हजार बढी कर्मचारी छन्।

तर, कर्मचारी संख्यालाई मात्रै आधार मानेर कम्पनीको उत्पादन क्षमता तुलना गर्न भने मिल्दैन। सन् २०२५ मा बीवाईडीले करिब ४६ लाख सवारी बिक्री गर्दा प्रतिकर्मचारी औसत ५.३ वटा सवारी बिक्री गरेको देखिन्छ। टेस्लाको यो अनुपात करिब १२, फक्सवागनको १३.५ र टोयोटाको करिब २९ वटा छ।

यसमा एउटा महत्त्वपूर्ण पक्ष के छ भने बीवाईडीको कर्मचारी संख्यामा सवारी उत्पादनसँगै अन्य व्यवसायमा कार्यरत जनशक्ति पनि समावेश छ। कम्पनीको बहुमत स्वामित्व रहेको बीवाईडी इलेक्ट्रोनिकले अन्य ब्रान्डका लागि विद्युतीय उपकरण एसेम्बल गर्ने काम गर्छ। उक्त कम्पनीमा मात्रै सन् २०२५ को अन्त्यमा १ लाख ६५ हजार कर्मचारी थिए। यसबाहेक बीवाईडीको ब्याट्री, चिप, मोटर, ऊर्जा भण्डारण र रेल ट्रान्जिट व्यवसायका कर्मचारी पनि कुल संख्यामा समेटिएका छन्।

बीवाईडीले सन् २०२६ को पहिलो नौ महिनामा ३१ लाख ३१ हजार ५७६ सवारी बिक्री गरेको छ, जुन अघिल्लो वर्षको सोही अवधिको तुलनामा ३.९ प्रतिशत कम हो। सेप्टेम्बरमा ४ लाख ६३ हजार ५६१ सवारी बिक्री गर्दै यस वर्षकै उत्कृष्ट मासिक प्रदर्शन गरे पनि चीनको बजारमा तीव्र मूल्य प्रतिस्पर्धा र जीली तथा लिपमोटरजस्ता प्रतिस्पर्धीको चुनौती कम्पनीले सामना गरिरहेको छ। सन् २०२६ को पहिलो अर्धवार्षिक अवधिमा कम्पनीको आम्दानी र खुद नाफा दुवै घटेका छन्।

यद्यपि, विदेशमा भने बीवाईडीको बिक्री तीव्र गतिमा बढिरहेको छ। जनवरीदेखि सेप्टेम्बरसम्म कम्पनीले विदेशमा १३ लाख ४२ हजार ९६० सवारी बिक्री गरेको छ, जुन अघिल्लो वर्षको तुलनामा ९२.७ प्रतिशत बढी हो। यो कम्पनीको कुल बिक्रीको करिब ४३ प्रतिशत हो। तर, विदेशमा कार्यरत कर्मचारीको हिस्सा भने कुल जनशक्तिको करिब ६ प्रतिशत मात्रै छ। थाइल्यान्ड, ब्राजिल र हंगेरीमा उत्पादन केन्द्र विस्तार भइरहे पनि बीवाईडीले अझै ठूलो मात्रामा चीनमै उत्पादन गरेर अन्तर्राष्ट्रिय बजारमा सवारी निर्यात गरिरहेको देखिन्छ।