टोयोटाले इसुजुसँग मिलेर लङ रेन्जको हाइड्रोजन फ्युल सेल बस ल्याउने

टोयोटाले हाइड्रोजनबाट चल्ने आफ्नो लोकप्रिय सोरा फ्युल सेल बसको नयाँ संस्करण सार्वजनिक गर्ने भएको छ। नयाँ बसले एकपटक हाइड्रोजन भरेपछि ३०० किलोमिटरभन्दा बढी दूरी तय गर्न सक्ने कम्पनीले जनाएको छ। यो अघिल्लो मोडलको तुलनामा करिब १०० किलोमिटर बढी हो।

टोयोटाले सन् २०१८ देखि सोरा फ्युल सेल बस बिक्री गर्दै आएको छ। नयाँ संस्करण भने इसुजु मोटर्ससँगको सहकार्यमा विकास गरिएको हो। यसमा इसुजुले विकास गरेको बस प्लेटफर्म र टोयोटाको फ्युल सेल प्रणालीलाई एकीकृत गरिएको छ।

नयाँ बसमा फ्युल सेल प्रणालीसँगै उच्च क्षमताको ब्याट्री प्रयोग गरिएको छ। यी दुवै प्रणालीको संयोजनले बसको ड्राइभिङ रेन्ज बढाउनुका साथै प्रयोगलाई थप सहज बनाउने कम्पनीको भनाइ छ।

बसमा ह्विलचेयर प्रयोगकर्ताका लागि सहज हुने गरी ह्विलचेयर सुरक्षित रूपमा राख्न मिल्ने प्रणाली पनि जडान गरिएको छ। त्यस्तै, नयाँ सुरक्षा प्रविधिहरू पनि समावेश गरिएको छ। फ्युल सेल प्रणाली र हाइड्रोजन ट्याङ्कलाई बसको छतमा राखिएको छ, जसले सवारीसाधनको मर्मतसम्भारलाई सहज बनाउने अपेक्षा गरिएको छ।

यसैबीच, इसुजुले पनि आफ्नो पहिलो फ्युल सेल बस एर्गा एफसीभी बिक्री सुरु गर्ने घोषणा गरेको छ। यो बस इसुजु र हिनो मोटर्सको संयुक्त लगानीमा सञ्चालित जे–बसको उत्सुनोमिया प्लान्टमा उत्पादन हुनेछ।

एर्गा एफसीभीको आधारभूत संरचना नयाँ टोयोटा सोरासँग लगभग समान रहेको बताइएको छ। यसले पनि एकपटक हाइड्रोजन भरेपछि ३०० किलोमिटरभन्दा बढी दूरी तय गर्न सक्नेछ।

इसुजुको नयाँ फ्युल सेल बसमा यात्रु तथा सडक सुरक्षाका लागि विभिन्न प्रविधि समावेश गरिएको छ। बसको अगाडिको भागमा रहेका पैदलयात्री तथा साइकल चालक पहिचान गरी चालकलाई चेतावनी दिने प्रणाली राखिएको छ। त्यस्तै, चालकलाई स्वास्थ्यसम्बन्धी समस्या वा अन्य असामान्य अवस्था आइपरेमा बसको गति कम गर्दै आवश्यक अवस्थामा आफैं रोक्न सक्ने प्रणाली पनि उपलब्ध छ।

नयाँ टोयोटा सोरा र इसुजु एर्गा एफसीभीको मूल्य भने सार्वजनिक गरिएको छैन। यी दुई कम्पनीले फ्युल सेल प्रविधिमा सहकार्य गर्दै सार्वजनिक यातायातका लागि लामो रेन्ज र कम प्रदूषण गर्ने बस विकास गर्ने प्रयासलाई अघि बढाएका छन्।