अमेरिकी बजारबिना नै ५ वर्षभित्र टोयोटालाई उछिन्ने बीवाईडीको दाबी, यस्तो छ रणनीति

काठमाडौं–बीवाईडीले अमेरिकी बजारको सहयोग बिना नै आगामी पाँच वर्षभित्र जापानी अटोमोबाइल जायन्ट टोयोटालाई उछिनेर विश्वकै सर्वाधिक बिक्री हुने अटोमेकर बन्ने महत्त्वाकांक्षी लक्ष्य सार्वजनिक गरेको छ ।

कम्पनीकी कार्यकारी उपाध्यक्ष स्टेला लीले ‘फाइनान्सियल टाइम्स’ सँगको कुराकानीमा यो दाबी गरेकी हुन् । चीनमा उत्पादित गाडीहरूमा अमेरिकाले उच्च भन्सार महसुल लगाएका कारण बीवाईडीले अमेरिकी बजारको विकल्प खोज्दै अन्य अन्तर्राष्ट्रिय क्षेत्रमा आफ्नो ध्यान केन्द्रित गरेको छ ।

अमेरिकी बजारमा पहुँच नभए पनि कम्पनीले विश्वका अन्य बलिया बजारहरूलाई लक्षित गर्दै आफ्नो उपस्थिति बलियो बनाउँदै लगेको छ । बीवाईडीले विशेषगरी युरोप, ल्याटिन अमेरिका, दक्षिण–पूर्वी एसिया र अष्ट्रेलियामा आफ्नो पकड बलियो बनाउँदै जाने रणनिती बनाएको छ।

कम्पनीले हालै मात्र कुल १ करोड ७० लाख नयाँ ऊर्जा सवारी साधन (एनईभी) उत्पादनको ऐतिहासिक माइलस्टोन पार गरेको छ । कम्पनीको उत्पादनको गति पछिल्ला वर्षहरूमा निकै तीव्र देखिएको छ ।

गत महिना बीवाईडीका संस्थापक तथा अध्यक्ष वाङ चुआनफुले पनि चार्जिङ प्रविधिको तीव्र विकास र अन्तर्राष्ट्रिय बजारको व्यापक विस्तारका माध्यमबाट पाँच वर्षभित्र टोयोटालाई उछिन्ने योजना सार्वजनिक गरेका थिए ।

गत वर्षको बिक्रीलाई हेर्दा टोयोटाले (१ करोड ५ लाख युनिट कार बिक्री गर्दा बीवाईडीले ४५ लाख ५० हजार युनिट कार बिक्री गरेको थियो । सन् २०२६ मा कम्पनीले विश्वभर ५० देखी ५५ लाख एनईभी बिक्री गर्ने लक्ष्य लिएको छ ।