कान्ति लोकपथमा पहिरोः दुई स्थानमा सडक अवरुद्ध, आवगमन पूर्ण रूपमा ठप्प

काठमाडौँ–लगातारको वर्षाका कारण कान्ति लोकपथ सडकखण्डको दुई छुट्टाछुट्टै स्थानमा पहिरो जाँदा सवारी आवागमन पूर्ण रूपमा बन्द भएको छ । मंगलबार बिहान सडकमा पहिरो खसेपछि हेटौँडा र काठमाडौँतर्फ गुड्ने सवारी साधनहरू बीच बाटोमै रोकिएका छन् ।

इलाका प्रहरी कार्यालय ठिंगनका अनुसार असार १६ गते बिहान (राति) १२ः३० बजे मकवानपुरको बकैया गाउँपालिका–१२ ठिंगनस्थित सडकखण्डमा माथिबाट ठुला ढुङ्गासहितको पहिरो खसेको थियो । पहिरोका कारण सडक पूर्ण रूपमा थुनिएपछि बिहान ५ः३० बजेदेखि नै प्रहरी टोलीले स्थानीय प्रशासनको सहयोगमा पहिरो पन्छाउने कार्य सुरु गरेको थियो ।

ठिंगनको पहिरो पन्छाएर बिहान ६ः३५ बजे सडक खुलाउने प्रयास भइरहेकै बेला कान्ति लोकपथकै अर्को खण्डमा पुनः पहिरो खसेको छ । जिल्ला प्रहरी कार्यालय मकवानपुरका अनुसार मकवानपुरको भीमफेदी गाउँपालिका–८ स्थित भर्याङ डाँडामा दोस्रो पहिरो खसेको हो ।

भर्याङ डाँडामा खसेको पहिरो निकै ठुलो र लेदोसहितको भएकाले तत्कालै सडक खुलाएर यातायात सञ्चालन गर्न सक्ने अवस्था नरहेको प्रहरी स्रोतले जनाएको छ ।

मौसम प्रतिकूल रहेकाले र पहिरो पन्छाउन समय लाग्ने देखिएकाले यस सडकखण्ड भई यात्रा गर्ने यात्रुहरूलाई वैकल्पिक मार्ग (त्रिभुवन राजपथ वा विपी राजमार्ग) प्रयोग गर्न प्रहरीले अनुरोध गरेको छ ।