५१ प्रतिशतको वार्षिक वृद्धिसँगै एम्पियरले पार ग-यो ४ लाख ई–स्कुटर बिक्रीको माइलस्टोन

एम्पियरले एक नयाँ र ऐतिहासिक माइलस्टोन पार गरेको छ । ग्रिभ्स इलेक्ट्रिक मोबिलिटी अन्तर्गतको यस ब्रान्डले भारतभर आफ्नो समग्र ई–स्कुटर बिक्री ४ लाख युनिट कटाएको घोषणा गरेको छ ।

पर्यावरणमैत्री र किफायती यात्रातर्फ उपभोक्ताको आकर्षण बढ्दै जाँदा एम्पियरले यो सफलता हात पारेको हो ।

कम्पनीले जारी गरेको विवरण अनुसार, आर्थिक वर्ष २०२६ मा एम्पियरले वार्षिक रूपमा ५१ प्रतिशतको लोभलाग्दो वृद्धि दर्ता गरेको छ । यस तीव्र वृद्धिसँगै कम्पनीको बजार हिस्सा पनि उकालो लागेको छ । आर्थिक वर्ष २०२५ मा ३.६ प्रतिशत रहेको यसको बजार हिस्सा बढेर अहिले ४.४ प्रतिशत पुगेको हो ।

यो ऐतिहासिक सफलताको खुसीयाली साट्दै ग्रिभ्स इलेक्ट्रिक मोबिलिटीका प्रबन्ध निर्देशक विकास सिंहले भने, ‘४ लाखको माइलस्टोन पार हुनुले एम्पियरप्रति ग्राहकको बढ्दो विश्वासलाई देखाउँछ । १ लाख भारु भन्दा कम मूल्यको सेग्मेन्टमा भरपर्दो र मूल्य–संचालित विद्युतीय गतिशीलता प्रदान गर्ने हाम्रो प्रतिबद्धतालाई यसले प्रमाणित गरेको छ ।’

एम्पियरले हाल बजारमा ग्राहकको फरक आवश्यकता र बजेट अनुसारका पाँचवटा मोडल बिक्री गर्दै आएको छ । जसमा नेक्सस, म्याग्नस जी म्याक्स, म्याग्नस ग्रान्ड, म्याग्नस नियो र रियो ८० समावेश छन् ।

एम्पियरका इलेक्ट्रिक स्कुटर नेपाली बजारमा समेत उपलब्ध छन् । नेपालका लागि आधिकारिक वितरक एसटीसी अटो सोलुसन प्रालिले यसको तीनवटा मोडल उपलब्ध गराएको छ, जसको सुरुवाती मूल्य ३ लाख रुपैयाँ पर्छ ।