किया सोनेटलाई क्र्यास टेस्टमा १ स्टार रेटिङ

भारतमा निर्मित किया सोनेटले ग्लोबल एनक्यापको क्र्यास टेष्टमा १ स्टार रेटिङ प्राप्त गरेको छ । अफ्रिकी बजारको लागि उत्पादन गरिएको सोनेटले वयस्क यात्रु सुरक्षाका लागि २१.२९/३४ अंक र बाल यात्रु सुरक्षाका लागि २८.५७/४९ अंक प्राप्त गरेको हो ।

परीक्षण रिपोर्ट अनुसार, सोनेटले फ्रन्टल इम्प्याक्ट टेस्टमा टाउको र घाँटीमा राम्रो सुरक्षा प्रदान गरेको थियो । परिक्षण गरिएको उक्त एसयूभीले चालक र यात्रु दुबैको छातीमा पर्याप्त सुरक्षा देखाएको थियो । साथै, चालक र यात्रुको घुँडाले मार्जिनल सुरक्षा देखाएको थियो ।

साइड इम्प्याक्ट टेस्टमा टाउको र पेल्भिसले राम्रो सुरक्षा देखाएको थियो भने पेटले पर्याप्त सुरक्षा देखाउँदा छातीले भने कमजोर सुरक्षा देखाएको थियो ।

परीक्षण गाडीमा डुअल फ्रन्ट एयरब्याग, सिटबेल्ट प्रिटेन्सनर, लोड लिमिटर, सिटबेल्ट रिमाइन्डर, आइएसओफिक्स र ईएससी जस्ता सेफ्टि फिचर उपलब्ध गराइएका थिए ।