पाँच वर्षभित्र विश्वको सबैभन्दा ठूलो अटोमेकर बन्ने बीवाईडी अध्यक्षको खुलासा

आगामी पाँच वर्षभित्र आफ्नो कम्पनी विश्वको सबैभन्दा ठूलो अटोमेकर बन्ने बीवाईडीका अध्यक्ष वाङ चुआनफुले बताएका छन् । चीनमा आयोजित कम्पनीको वार्षिक साधारण सभामा बोल्दै वाङले बीवाईडी अवको पाँच वर्षभित्र स्केलका हिसाबले विश्वको सबैभन्दा ठूलो अटोमेकर बन्ने खुलासा गरेका हुन् ।

अन्तर्राष्ट्रिय बजारमा चिनियाँ अटोमेकरको बलियो वृद्धिलाई प्रकाश पार्दै उनले प्रतिस्पर्धी मूल्य, उन्नत प्रविधि र उत्कृष्ट प्रयोगकर्ता अनुभवका आधारमा बीवाईडीका उत्पादनले स्थानिय प्रतिस्पर्धीहरुलाई पछि पारेको उल्लेख गरे ।

कम्पनीले यस वर्षका लागि १.६ मिलियन सवारी साधनको विदेशी बिक्री लक्ष्य तय गरे पनि उक्त संख्यालाई सजिलै पार गर्ने उनको भनाइ छ ।

अटोमोटिभ इन्टेलिजेन्सको भविष्यलाई सम्बोधन गर्दै, वाङले गाडीलाई ‘मूर्त बुद्धिमत्ता’ को रूपमा वर्णन गरे ।

सडकमा यसअघि नै ३१ लाख ५० हजार इन्टेलिजेन्ट ड्राइभिङ भेइकल भएको र बीवाईडीले हरेक दिन २० करोड किलोमिटरका दरले डेटा सङ्कलन गरिरहेको उनको भनाइ थियो । यो डेटासेटले कम्पनीको अर्को स्तरको अटाेनाेमस ड्राइभिङ क्षमताका लागि आधारको रूपमा काम गर्नेछ ।

साथै उनले, एल३ र एल४ अटाेनाेमस ड्राइभिङ प्रविधिहरू अपेक्षा गरिएको भन्दा चाँडो बजारमा पुग्ने घोषणा गरे । बीवाईडी चिप्स, एल्गोरिदम र डेटा इकोसिस्टमहरूमा पूर्ण रूपमा तयार रहेको उनको भनाइ छ ।

चीनसहित अष्ट्रेलिया, युरोप र दक्षिण अमेरिकी बजारमा बीवाईडी एक प्रिमियम ब्रान्डका रुपमा उदाउँदै गरेको वाङले बताए । उनले भने, ‘अटोमोबाइल जीवन सुरक्षा समावेश गर्ने यातायात उपकरण भएकाले हामीले प्रविधिको सारमा फर्कनु पर्छ । अर्को वर्ष रिलिज हुने अचम्मका प्रविधिको नयाँ लहरले कम्पनीको ब्रान्ड प्रिमियमाइजेशनमा ठूलो योगदान दिनेछ ।’