थप महंगो बन्दै सुजुकी कार

मारुती सुजुकीले आगामी जुनदेखि आफ्ना सवारी साधनको मूल्य ३० हजार भारुसम्म बढाउने घोषणा गरेको छ । मोडलअनुसार मूल्य बृद्धिको दर फरक पर्ने कम्पनीले जनाएको छ ।

कार उत्पादनको लागत बढेपछि कम्पनीले मूल्य बृद्धि गर्न लागेको हो । भारतको सबैभन्दा ठूलो कार निर्माताले पछिल्लो समय निरन्तर मुद्रास्फीतिको दबाब झेल्नु परेको छ ।

डलरको तुलनमा भारु कमजोर हुँदा आयतित कच्चा पदार्थको मूल्य बढेपछि कम्पनी मूल्य बृद्धि गर्नुपर्ने अवस्थामा पुगेको हो । मारुती सुजुकीले यसअघि धेरै पटक आफ्ना कारको मूल्य समायोजन गरिसकेको छ ।

भारतमा हुने मूल्य बृद्धिको असर नेपाली बजारमा समते पर्नेछ । बढ्दो ईभी प्रभावका कारण बिक्रीमा निरन्तर दबाव झेल्दै आएको सुजुकीको नेपाली बाजर यसप्रकारको मूल्य बृद्धिले झनै प्रभावित हुने अनुमान गर्न सकिन्छ ।

भारतमा ३० हजार भारु बृद्धि हुँदा नेपालमा १ लाख ५० हजार सम्मले महंगो पर्ने देखिन्छ । नेपाली बजारमा हाल सुजुकीका ब्रेजा, ई–भिटारा, भिक्टोरिस, फ्रंक्स, जिम्नी, ग्रान्ड भिटारा, स्विफ्ट र वागन आरजस्ता मोडल उपलब्ध छन् ।