गाडी किन्न नेपाल बैंकले ५.२८ प्रतिशत ब्याजदरमै अटो लोन दिने

काठमार्डौं– नेपाल बैंकले सस्तो ब्याज दरमा अटोलोन दिने भएको छ । बैंकले ५.२८ प्रतिशत ब्याजदरमा ७ वर्षसम्मका लागि अटो लोन दिने स्किम ल्याएको हो । बैंकको नेपालभर रहेका शाखाबाट सरल र सहज प्रक्रियामा लोन लिन सकिने जनाइएको छ ।

स्किम पेट्रोल/डिजेलबाट चल्ने कार र ईभी दुबैमा उपलब्ध हुनेछ । ‘अब नयाँ गाडी खरिद गर्न अझ सहज र सरल’ ट्यागलानसहित आएको यस अफर सीमित अवधिका लागि मात्र लागु हुनेछ ।

बैंकले गाडी मूल्यको ६० प्रतिशतसम्म लोन दिने जनाएको छ । जसका लागि आयस्रोत सहित आवश्यक विभिन्न डकुमेन्ट पेश गर्नुपर्ने हुन्छ ।

बैंकहरुमा पर्याप्त लगानीयोग्य पुजी थन्किनु र कर्जाको माग न्यून हुनुजस्ता कारणले पछिल्लो समय ब्याजदर निरन्तर घट्दो क्रममा छ । अहिले प्रायः सबैजसो वाणिज्य बैंकले एकल अंकको ब्याजदरमै अटो लोन प्रवाह गरिरहेका छन् ।