फ्ल्यास चार्ज सपोर्ट गर्ने बीवाईडी ईभीको माग उच्च, ब्याट्री अभाव हुने संकेत

चीनमा बीवाईडीको फ्ल्यास चार्ज प्रविधियुक्त मोडलको माग उच्च मात्राका बृद्धि भएको छ । कम्पनीले केही समयअघि मात्र आफ्ना दुई मोडल फेङ चाङ वाओ टीआई७ र डेन्जा जेड९ जिटी मोडलमा सो नयाँ प्रविधि उपलब्ध गराएको थियो । हाल ती मोडलको माग १ लाख ४० युनिट कटिसकेको जनाइएको छ ।

फ्ल्यास चार्जिङ प्रविधि र पछिल्लो पुस्ताको ब्लेड ब्याट्रीलाई एकसाथ लन्च गरेपछि चीनमा बीवाईडी गाडीको माग उच्च दरले बृद्धि भइरहेको आईटी होमले जनाएको छ । यो नयाँ प्रविधिलाई कम्पनीले विस्तारै आफ्नो डायनास्टि, ओसियन, डेन्जा र याङवाङ ब्रान्ड मातहतका सम्पूर्ण मोडलमा विस्तार गर्ने योजना बनाएको छ ।

नयाँ प्रविधियुक्त ईभीको माग बढेपछि कम्पनीले ब्याट्री आपूर्तिमा अवरोधको सामना गरिरहेको बीवाईडीका अध्यक्ष वाङ चुआनफुले बताएका छन् । मे १५ मा याङवाङ बिजनेस रिसर्च इन्स्टिच्युट सम्मेलनमा बोल्दै उनले बीवाईडीको सेकेन्ड जेनेरेसन ब्लेड ब्याट्रीले केही समयका लागि आभवको अवस्था झेल्नुपर्ने स्विकार गरेका हुन् ।

कम्पनीले छिट्टै डिसस–पी सस्पेन्सन टेक्नोलोजी भएको डेन्जा बी५ र बी८ मोडलको समेत फ्ल्यास चार्ज संस्करण लन्च गर्ने तयारी गरेको छ । साथै, नयाँ एट्टो३ मा समेत सो नयाँ प्रविधि सपोर्ट गर्नेछ ।

चीनका उद्योग स्रोतहरूले ब्याट्रीको अवरोधलाई दोस्रो पुस्ताको ब्लेड ब्याट्री प्याक र अल्ट्रा–फास्ट चार्जिङ प्रणालीहरू प्रयोग गर्ने नयाँ बीवाईडी मोडेलको बलियो मागसँग जोडेका छन् ।

।