चार्जिङ एन्जाइटी हटाउने बीवाईडीको ‘फ्ल्यास चार्जिङ’ प्रविधि हेर्ने अवसर (भिडियो सहित)

हालै सम्पन्न बेइजिङ अटो शोमा सार्वजनिक भएको ‘फ्ल्यास चार्जिङ’ प्रविधि अहिले विश्व अटो बजारमा चर्चाको केन्द्र बनिरहेको छ । न्यू इनर्जी भेइकलमार्फत विश्व बजारमा तहल्का पिटिरहेको चिनियाँ अटो जायन्ट बीवाईडीले ल्याएको यो नयाँ प्रविधिले ब्याट्री इलेक्ट्रिक भेइकलमा देखिँदै आएको ‘चार्जिङ एन्जाइटी’लाई पूर्णरुपमा अन्त्य गर्ने आँकलन गरिएको छ ।

यसअघि अधिकांश ईभीमा रेन्ज एन्जाइटीको समस्या निकै ठूलो थियो तर अहिले उच्च प्रविधिका ब्याट्रीका कारण यो समस्या लगभग समाधान भइसकेको छ । हाल ब्याट्रीलाई फुल चार्ज गर्न लाग्ने समयका कारण धेरै ईभी प्रयोगकर्ताहरु हैरानीमा पर्दै आएका छन् भने यही समस्याका कारण ईभीको भविष्यमाथि नै विभिन्न टिकाटिप्पणी समेत हुने गरेको पाइन्छ । यी समस्यालाई समाधान गर्न बीवाईडीले ल्याएको फ्ल्यास चार्जिङ प्रविधि अहिले गेम चेन्जर बनेर उदाएको छ ।

बीवाईडीले ल्याइको यो युगन्तकारी प्रविधिले निकै छोटो समयमा गाडीको ब्याट्रीलाई फुल चार्ज गरिदिन्छ । १ मिनेटको चार्जमा ९० किलोमिटर रेन्ज दिने फ्ल्यास चार्जिङमार्फत केवल ८.२६ सेकेन्डमै ९७ प्रतिशत चार्ज गर्न सकिन्छ । जसबाट ६०५ किलोमिटर रेन्ज पाउन सकिन्छ । अर्थात भनौ, पेट्रोलियम गाडीमा फुल ट्यांक तेल भर्न लाग्ने समयकै हाराहारीमा विद्युतीय कारलाई पनि फुल चार्ज गर्न सकिन्छ । यसले चार्ज गर्न कुर्नुपर्ने घन्टौ लामो समयको वचत गराउनेछ ।

यो नयाँ प्रविधिको अर्को विशेषता भनेको अत्यधिक चिसोमा समेत यसले प्रभावकारी तवरबाट काम गर्न सक्नु हो । कम्पनीले सेन्जेनस्थित हेडक्वार्टर परिसरमा माइनस ३० डिग्री सेन्टिग्रेडको थर्मल च्याम्बर निर्माण गरी यही फ्ल्यास चार्जिङ प्रविधिमार्फत ९ मिनेटमै १० प्रतिशतबाट ९७ प्रतिशत चार्ज गरेको डेमो प्रदर्शन गरेको थियो । सो प्रविधिको लाइभ डेमो हेर्ने अवसर मैले समेत प्राप्त गरेको थिए ।

बीवाईडीको एसिया प्यासिफिक अटो सेल्स डिभिजनका महाप्रबन्धक लिउ सुलियाङका अनुसार तत्कालका लागि चिनियाँ बजारमा मात्रै उपलब्ध यस प्रविधिबाट निकट भविष्यमै विश्वभरका ईभी प्रयोगकर्ता लाभान्वित हुनेछन् । नेपालबाट गएका पत्रकारहरूसँग कुरा गर्दै उनले भने, ‘ईभी उद्योगमा देखा परेको चार्जिङ एन्जाइटीलाई हटाउन फ्ल्यास चार्जिङ एक गेम चेन्जिङ प्रविधि बनेर उदाएको छ । निकट भविष्यमै हामी यसलाई नेपालसहित विश्वका धेरै देशमा विस्तार गर्ने योजनामा छौ ।’ लिउका अनुसार हाल यो सुविधा ‘सुपर ई–प्लेटफर्म’ मा आधारित नयाँ पुस्ताका बीवाईडी गाडीमा मात्र उपलब्ध हुनेछ । फ्ल्यास चार्जिङ सपोर्टका लागि बीवाईडीले हालै आफ्नो ब्लेड ब्याट्रीको सेकेन्ड जेनेरेसन समेत लन्च गरेको छ ।

हाल चीनभर ५ हजारभन्दा बढी फ्लायस चार्जर जडान गरिसकेको र यस वर्षको अन्त्यसम्म यसलाई बढाएर २० हजार पु¥याउँने कम्पनीले लक्ष्य लिएको छ । १ हजार ५ सय किलोवाट क्षमताको चार्जर सञ्चालन गर्न अत्यधिक स्थिर र शक्तिशाली विद्युत् प्रणाली चाहिने कारण यस नयाँ प्रविधिलाई विस्तार गर्नु उत्तिकै चुनौतीपूर्ण समेत रहेको बताइएको छ । हाल यो प्रविधि बीवाईडीका ‘सुपर ई–प्लेटफर्म’ मा आधारित प्रिमियम मोडलमा मात्र सीमित छ भने निकट भविष्यमा अन्य मोडलमा समेत विस्तार हुनेछ ।

• तोयानाथ पौडेल