यातायात व्यवसायी राष्ट्रिय महासंघको अध्यक्षमा सरोज सिटौला निर्वाचित

पोखरा - यातायात व्यवसायीहरूको नेपाल यातायात व्यवसायी राष्ट्रिय महासंघको अध्यक्षमा पुण्यप्रसाद सिटौला (सरोज) निर्वाचित भएका छन् । पोखरामा सम्पन्न महासंघको सातौं महाधिवेशनबाट उनी फराकिलो मतान्तरसहित अध्यक्ष निर्वाचित भएका हुन् ।

सिटौलाले १ हजार ३० मत प्राप्त गरेका छन् । प्रतिस्पर्धी हरिशरण केसीको पक्षमा ४ सय ६४ मत खसेको छ।

महासंघको वरिष्ठ उपाध्यक्षमा सानुकाजी प्रजापति, ऐन कुमार साई र केदार प्रसाद पौडेल विजयी भएका छन् ।
सम्पूर्ण मतदाता प्रति आभार व्यक्त गर्दै नवनिर्वाचित अध्यक्ष सिटौलाले यातायात क्षेत्रको सुधार तथा व्यावसायिक हितमा काम गर्ने प्रतिबद्धता गरेका छन् ।

उपाध्यक्षहरूमा चन्द्रा ओझा, डम्बरराज पन्त, आत्मराम थापा, कान्छाराम थिङ, कान्छामान बल, जितबहादुर भारती र रामप्रसाद सुवेदी विजयी भएका छन्।

सात उपाध्यक्ष पदका लागि १३ जना प्रतिस्पर्धामा उत्रिएका थिए।

महासंघको मालवाहकतर्फको उपाध्यक्षमा यादवलाल श्रेष्ठ र महासचिवमा डेकनाथ गौतम विजयी भए।

त्यसैगरी उपमहासचिवमा देविन श्रेष्ठ, भानुभक्त बराल र पुरूषोत्तम सिंखडा विजयी भएका थिए।

सचिवमा उमेश केसी, चेतप्रसाद गौतम र टंकप्रसाद बस्याल निर्वाचित भएका छन्।

कोषाध्यक्षमा राजेन्द्र आचार्य ७१६ मत ल्याएर विजयी भए। सहकोषाध्यक्षमा शोभाखर पौडेल विजयी भए। महाधिवेशनबाट कूल ७८ सदस्यीय कार्यसमिति निर्वाचित भएको छ।