बेइजिङ अटो शो २०२६ सुरु, उड्ने कारदेखि भविष्यका सवारी प्रविधिको भव्य प्रदर्शन

विश्वकै सबैभन्दा ठुलो अटो प्रदर्शनीमध्ये एक बेइजिङ अटो शो २०२६ सुरु भएको छ। अप्रिल २४ देखि मे ३ सम्म सञ्चालन हुने यस मेगा इभेन्टमा भविष्यको सवारी प्रविधि, विद्युतीय गाडी र स्मार्ट कनेक्टेड सिस्टमको भव्य प्रदर्शन भइरहेको छ । आयोजकका अनुसार यस वर्षको प्रदर्शनी ३ लाख ८० हजार वर्ग मिटरभन्दा बढी क्षेत्रमा फैलिएको छ, जहाँ १४०० भन्दा बढी सवारी साधन र १८० भन्दा बढी विश्व प्रिमियर प्रस्तुत गरिनेछ ।

प्रदर्शनीमा ‘८’ र ‘९’ सिरिजका स्मार्ट र इलेक्ट्रिक एसयूभीहरूको विशेष दबदबा देखिएको छ। नियोको ईएस९, लाइअटोका एल९ र एल८, फक्सवागनको आईडीडट यूएनवाईएक्स ०८/०९ र बीवाईडीको ग्रेट ट्याङ जस्ता मोडल प्रमुख आकर्षण बनेको छ । विशेषगरी फक्सवागनले “चीनका लागि चीनमै” रणनीति अन्तर्गत नयाँ मोडलहरू प्रस्तुत गर्दै चिनियाँ बजारमा आफ्नो उपस्थितिलाई अझ सुदृढ बनाउने संकेत दिएको छ।

एक समय चीनको अटो बजारमा टोयोटा, बीएमडब्ल्यु र फक्सवागनजस्ता विदेशी कम्पनीको प्रभुत्व थियो, तर अहिले अवस्था परिवर्तन भएको छ। शाओमी, बीवाईडी र एक्सपेङ जस्ता चिनियाँ ब्रान्डले विद्युतीय सवारी क्षेत्रमा तीव्र प्रगति गर्दै विदेशी कम्पनीलाई चुनौती दिइरहेको छ ।

दुई ठुला स्थलमा आयोजना गरिएको यो शो क्षेत्रफलका हिसाबले करिब ५० फुटबल मैदान बराबर फैलिएको छ। सयौं स्वदेशी तथा अन्तर्राष्ट्रिय कम्पनीको सहभागितामा आयोजना भइरहेको सो कार्यक्रममा व्यवसायी र मिडियाका लागि प्रारम्भिक पहुँच खुला गरिएको छ भने सर्वसाधारणले अप्रिल २८ देखि अवलोकन गर्न सक्नेछन्।

यस वर्षको शोको अर्को मुख्य आकर्षण भविष्यका यातायात प्रविधि हुन्। एक्सपेङले आफ्नो नयाँ स्मार्ट ड्राइभिङ सिस्टमसँगै फ्लाइङ कार र रोबोटिक्स प्रविधिको झलक प्रस्तुत गर्ने जनाएको छ। यसले अटो उद्योग अब केवल सवारी साधनमा सीमित नरही प्रविधिको समग्र विकासतर्फ अघि बढिरहेको स्पष्ट देखाउँछ।

बीएमडब्ल्युले ब्याट्री प्रविधिका लागि सीएटीएलसँग सहकार्य गरेको छ भने औडीले आफ्ना सवारी साधनमा हुवावेको ड्राइभिङ असिस्टेन्स सिस्टम प्रयोग गर्न थालेको छ। साथै फक्सवागनले पनि नयाँ पुस्ताका विद्युतीय गाडी विकास गर्न एक्सपेङसँग साझेदारी गरिरहेको छ ।

शाओमीले आफ्नो एसयू७ प्रो मोडलमार्फत बेइजिङदेखि सांघाईसम्म करिब १३०० किलोमिटर दूरी एकैपटक चार्जमा पार गरेर सबैलाई चकित पारेको छ । कम्पनीका प्रमुख लि जुङले उक्त यात्रा १५ घण्टामा पूरा गरेका थिए, जसले विद्युतीय सवारीको भविष्य अझ बलियो बन्दै गएको संकेत गर्छ ।