नाइमा स्थापनाको पहिलो वर्ष पुरा, भए यी गतिबिधी

काठमाडौं– ‘मोबिलिटी फर अल’को उद्देश्यसहित स्थापना भएको नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन(नाइमा)ले स्थापनाको पहिलो वर्ष पूरा गरेको छ । रितूसिंह बैद्यको नेतृत्वमा एक वर्षअघि स्थापना भएको यस संस्थामा देशका प्रमुख सवारीसाधन आयातकर्ता तथा उत्पादकहरु आवद्ध छन् ।

यस एक वर्षमा नाइमाले सचिवालय स्थापना गर्दै संस्थागत संरचनालाई व्यवस्थित बनाएको छ र विभिन्न समितिहरूमार्फत प्राथमिकताका क्षेत्रमा काम अघि बढाएको छ ।

नीति संवाद र पैरवीमार्फत नाइमाले नेपाल सरकारसँग सहकार्य गर्दै अटोमोबाइल तथा मोबिलिटी क्षेत्रका मुख्य मुद्दाहरू उठाएको छ र निजी क्षेत्रका व्यवसायहरूका लागि सहज र सक्षम वातावरण निर्माण गर्न पहल गरेको छ ।

क्षमता अभिवृद्धिका क्षेत्रमा, नाइमाले प्राविधिक तालिम तथा शैक्षिक संस्थासँगको सहकार्यमार्फत विद्यार्थी, प्राविधिक जनशक्ति र भविष्यका दक्ष जनशक्ति विकासमा सहयोग गरेको छ ।

आपतकालीन अवस्थामा पनि नाइमाले सम्बन्धित निकायहरूसँग समन्वय गर्दै आवश्यक सहयोग गरेको छ, जसले संस्थाको सामाजिक जिम्मेवारीप्रतिको प्रतिबद्धतालाई थप स्पष्ट बनाएको छ ।

यससँगै, नाइमाले विभिन्न राष्ट्रिय तथा अन्तर्राष्ट्रिय साझेदारहरूसँग सहकार्य विस्तार गर्दै नेपालको मोबिलिटी क्षेत्रलाई समन्वित, सुरक्षित, दिगो र व्यवस्थित दिशातर्फ अघि बढाउने प्रयास गरेको छ ।

नाइमा मोबिलिटी एक्सपो २०२५, मोबिलिटी संबाद, नीति बहस, प्राविधिक तालिम तथा सहकार्यका विविध पहलहरूले संस्थालाई एक जिम्मेवार, विश्वसनीय र एकीकृत आवाजका रूपमा स्थापित गर्न योगदान पु-याएको नाइमाले जनाएको छ ।

आगामी दिनहरूमा पनि सहकार्य, संवाद र साझा प्रतिबद्धतासहित नेपालको अटोमोबाइल तथा मोबिलिटी क्षेत्रलाई अझ सुदृढ, व्यवस्थित र भविष्य उन्मुख बनाउँदै लैजाने प्रयास निरन्तर रहने प्रतिबद्धता जनाइएको छ ।