विद्युतीय गाडी अर्थात ईभी सर्भिसिङ गर्दा के जाँच गरिन्छ ? यी हुन् ध्यान दिनुपर्ने कुरा

डिजेल वा पेट्राेल भन्दा विद्युतीय गाडी अर्थात ईभी मर्मतकाे लागि कम खर्चिलाे हुन्छ । किनकि ईभीलाई पेट्रोल वा डिजेल गाडीभन्दा कम सर्भिसिङ आवश्यक पर्छ, तर यसलाई पूर्ण रूपमा मर्मतविहीन भन्न मिल्दैन। ईभी गाडीमा चल्ने पार्टहरू कम हुने भएकाले यसको मर्मत खर्च पनि कम हुन्छ । तर सुरक्षा र दीर्घायुका लागि केही भागहरूको नियमित जाँच आवश्यक हुन्छ।

ईभी सवारीलाई राम्रो अवस्थामा राख्न तलका मुख्य भागहरूमा ध्यान दिनुपर्छ:

ब्याट्री र विद्युतीय मोटर

ब्याट्री प्याक र विद्युतीय मोटर ईभीका मुख्य भाग हुन्। यसलाई वार्षिक रूपमा सम्बन्धित आधिकारिक सर्भिस सेन्टरमा परीक्षण गर्नु पर्छ । स्वास्थ्य परीक्षणले यसको कार्यक्षमता र कुनै प्रकारको कमजोरी (degradation) भएको छ कि छैन भन्ने पत्ता लगाउँछ। ब्याट्रीका सेलहरू कमजोर हुँदै जाँदा गाडीको एकपटक पुरा चार्जमा चल्ने दूरी ( Range) घट्छ । यदि तपाईं पुरानो सेकेन्ड ह्याण्ड ईभी किन्दै हुनुहुन्छ भने, किन्नु अगाडि यसको हालको ब्याट्री स्वास्थ्य रिपोर्ट अनिवार्य रूपमा जाँच गर्नुहोस्।

टायरहरू

ईभीहरू प्रायः भारी हुन्छन्, जसले टायरमा बढी दबाब दिन्छ। साथै, छिटो एक्सेलेरेशनका कारण टायर चाँडै घिसिन्छ। टायरको ट्रेड गहिराइ कम्तीमा १.६ मिमी हुनुपर्छ । याे भन्दा तल हुनु राम्राे मानिदैन । तर ३ मिमी भन्दा कम पुगेपछि टायर परिवर्तन गर्नु राम्रो हुन्छ, जसले सुरक्षित ड्राइभिङमा मद्दत गर्छ ।

ब्रेक प्रणाली

धेरै ईभीमा रिजेनेरेटिभ ब्रेकि प्रणाली हुन्छ । जसले ब्रेकको प्रयोगलाई केही मात्रामा कम गराउछ । तर पनि ब्रेक प्याड र डिस्क समयसँगै खिइने वा बिग्रन सक्छन्। जंक लाग्ने, घिसिने वा क्यालिपर अड्किने समस्या आउन सक्छ, त्यसैले नियमित जाँच आवश्यक हुन्छ । विशेषगरि ब्रेक आयल, ब्रेक प्याड, राेटर डिस्क आदि ।

सस्पेन्सन

ईभीको तौल बढी हुने भएकाले सस्पेन्सनका भागहरूमा बढी असर पर्छ। स्प्रिङ, सक एब्जर्बर र अन्य भागहरू समयसँगै बिग्रन सक्छन्। नियमित सर्भिसमा यी सबै जाँच गरिनुपर्छ ।

तेल र कुलेन्ट

ईभीमा इन्जिन नभए पनि केही गाडीमा ट्रान्समिसनका लागि तेल प्रयोग हुन्छ। साथै, ब्याट्री तथा माेटरको तापक्रम नियन्त्रण गर्न कुलेन्ट प्रयोग गरिन्छ। यी तरल पदार्थहरू समय–समयमा जाँच र आवश्यक अनुसार परिवर्तन गर्नुपर्छ।

वाइपर ब्लेड र वासर फ्लुइड

वाइपर ब्लेड समयसँगै खराब हुन्छ र राम्रोसँग सिसा सफा गर्न सक्दैन। यसले भिजिविलिटी घटाउँछ र सिसामा स्क्र्याच पनि पार्न सक्छ। त्यसैले बिग्रिन थालेपछि तुरुन्तै परिवर्तन गर्नु आवश्यक हुन्छ। साथै, सिसा सफा गर्ने तरल (washer fluid) पनि नियमित रूपमा भर्नुपर्छ, विशेष गरी जाडो मौसममा यसको प्रयोग बढी हुन्छ।

एसी फिल्टर

क्याविनकाे हावा फिल्टर गर्न वा एसी चलाउदा आउने हावालाई फिल्टर गर्न प्रयाेग गरिने फिल्टरलाई सर्भिसकाे समयमा बदल्नु पर्छ । यसले क्याविनलाई स्वच्छ राख्न मदत पुर्याउछ ।

अण्डरबडी चेक

नेपालकाे बाटाे-घाटाेकाे अवस्था अनुसार लामाे समय विद्युतीय गाडी चलाईसकेपछि राजमार्ग वा अफराेड ड्राइभिङ पछि तलकाे भागमा कुनै क्षति पुगेकाे छ वा छैन जाँच गर्नु राम्राे हुन्छ । हाई भाेल्टेज ब्याट्री, हाई भाेल्टेज कनेक्सन तथा माेटर रहने हुनाले यसकाे जाँच गर्नु राम्राे र सुरक्षित हुन्छ । कुनै क्षति देखिएमा तत्कालै मर्मत गर्नुपर्छ ।

यसरी, ईभीमा कम मर्मत आवश्यक भए पनि नियमित जाँच र हेरचाहले सवारीको कार्यक्षमता, सुरक्षा र आयु बढाउँछ ।

केपी पोख्रेल
pokhrelk123@gmail.com