प्रधानमन्त्री र मन्त्रीहरुका सवारी साधनमा ईभी धेरै, यस्तो छ सम्पूर्ण विवरण

हालै प्रधानमन्त्री बालेन्द्र शाह र मन्त्रीहरुको सम्पत्ति विवरण सार्वजनिक गरिएको छ । सम्पत्ति विवरण सार्वजनिक भएसँगै धेरै कुराहरुको चर्चा समेत चलेको छ । यसै सन्दर्भमा उनीहरुले पहिले देखि नै प्रयोग गर्दै आएको सवारी साधनको वारेमा समेत चासो हुने नै भयो । प्रधानमन्त्री र मन्त्रीहरुले सार्वजनिक गरेको विवरणका आधारमा सवारी साधनको वारेमा जानकारी दिने प्रयास गरिएको छ ।

प्रधानमन्त्री बालेन्द्र शाहले सार्वजनिक गरेको सम्पत्ति विवरणमा अटोमोबाइल सम्बन्धी कुनै विवरण प्रस्तुत गरिएको छैन । यसको अर्थ उनीसँग कुनै सवारी साधन नभएको बुझ्न सकिन्छ । त्यसैगरी भौतिक पूर्वाधार तथा यातायात मन्त्री सुनिल लम्सालसँग पनि कुनै सवारी साधन नभएको उल्लेख गरिएको छ ।

परराष्ट्र मन्त्री शिशिर खनालसँग ४० लाख मूल्यको चिनियाँ ईभी डोङफेङ भिगो छ । त्यसैगरी अर्थमन्त्री स्वर्णिम वाग्लेसँग ९४ लाख मूल्यको सुबारु एक्सभी छ । उनले अन्तर्राष्ट्रिय रोजगारी र मानार्थ अध्यक्ष रहेको आईआईडीएसको सहयोगमा सो गाडी खरिद गरेको बताएका छन् ।

उर्जा, जलस्रोत तथा सिंचाई मन्त्री विराजभक्त श्रेष्ठले २०६६ मा ८ लाख ७६ हजारमा खरिद गरेको टोयोटा ल्यान्डक्रुजर रहेको उल्लेख गरेका छन् । उनीसँग एमजी गाडी र स्कुटर समेत रहेको छ ।

गृहमन्त्री सुधन गुरुङसँग लगुना प्रिमियम अपार्टमेन्टको नाममा रहेको एमजी एस५ गाडी छ । यसको मूल्य ४७ लाख ९९ हजार रुपैयाँ भनिएको छ ।

कानुन, न्याय तथा संसदीय मामिला मन्त्री सोविता गौतमले २०८० मा २६ लाखमा किनेको र २०८१ मा ९५ लाखमा किनेको गाडी छ । उनको विवरणमा ब्रान्ड उल्लेख गरिएको छैन । त्यसैगरी उनीसँग स्कुटर समेत रहेको छ ।

महिला, बालबालिका तथा ज्येष्ठ नागरिक मन्त्री सीता वादीसँग पल्सर मोटरसाइकल र स्कुटर रहेको छ । मोटरसाइकल उनको श्रीमानको नाममा रहेको छ ।

संघीय मामिला तथा सामान्य प्रशासन मन्त्री प्रतिभा रावलसँग एमजी एस५ छ । २०८२ जेठ महिनामा ा श्रीमानको आयमार्फत सो गाडी ४४ लाखमा किनिएको उल्लेख गरिएको छ ।

स्वास्थ्य, जनसंख्या तथा खानेपानी मन्त्री निशा मेहतासँग २५ लाखमा किनिएको हुन्डाई ग्रान्ड आई१० गाडी छ । यसमा पनि श्रीमान र आफ्नो तलब र ऋण उपयोग गरिएको बताइएको छ ।

शिक्षा, विज्ञान तथा प्रविधि र युवा तथा खेलकुद मन्त्री सस्मित पोखरेलसँग रमेश कुमार पोखरेलको नाममा रहेको ४० लाखको किया निरो र ३९ लाख ६५ हजारको बीवाईडी डल्फिन छ ।

संस्कृति, पर्यटन तथा नागरिक उड्डयन मन्त्री खडक राज पौडेलसँग दाई पशुपति पौडेलको नाममा रहेको ३५ लाख मूल्यको जिप र २ लाखको दुईवटा स्कुटर रहेको छ ।

सञ्चार तथा सूचना प्रविधि मन्त्री विक्रम तिमिल्सिनासँग २३ लाख पर्ने कार छ । उनले स्वदेश वा विदेशमा काम गरेर कमाएको रकमबाट खरिद गरेको बताएका छन् ।

कृषि तथा पशुपन्छी र वन तथा वातावरण मन्त्री गीता चौधरीसँग ३ लाख ३० हजारको स्कुटर रहेको छ ।

उद्योग, वाणिज्य तथा आपूर्ति मन्त्री गौरी कुमारी यादवसँग हुन्डाई कोना ईभी रहेको छ । ५७ लाख मूल्यको सो गाडी कार्तिका यादवको नाममा रहेको छ ।

श्रम, रोजगार तथा सामाजिक सुरक्षा मन्त्री रामजी यादवसँग २०७३ मा २ लाख ७० हजारमा खरिद गरेको यामाहा मोटरसाइकल रहेको छ ।

यसरी हेर्दा धेरै मन्त्रीहरुसँग इलेक्ट्रिक गाडी अर्थात ईभी रहेको पाइएको छ । पछिल्लो समयमा नेपालमा ईभीको क्रेज बढ्दो छ । एमजी, किया, हुन्डाई, बीवाईडी, डोङफेङ लगायतका ईभी ब्रान्ड मन्त्रीहरुसँग रहेका छन् ।

प्रधानमन्त्री र मन्त्रीहरुको सवारी साधनका साथै अन्य सम्पत्ति विवरण यहाँ हेर्न सकिन्छ ।