मारुती ई–भिटाराले सेफ्टी परीक्षणमा देखायो मजबुत प्रदर्शन, भारतमा ५ स्टार तर अष्ट्रेलियामा ४ स्टार

भारतमा निर्माण भएर विश्व बजारमा बिक्रीका लागि प्रस्तुत गरिएको सुजुकीको पहिलो इलेक्ट्रिक एसयूभी ई–भिटाराले सेफ्टी परीक्षणमा प्रभावशाली प्रदर्शन गरेको छ। हालै अष्ट्रेलियाको नयाँ कार मूल्याङ्कन कार्यक्रम अन्तर्गत गरिएको क्र्यास परीक्षणमा यस गाडीले ४ स्टार सेफ्टी मूल्याङ्कन प्राप्त गरेको हो। यद्यपि ५ स्टार प्राप्त गर्न केही अंकले मात्रै पछाडि परेको भए पनि, समग्र रूपमा यो गाडीलाई सुरक्षित र भरपर्दो इलेक्ट्रिक एसयूभीका रूपमा मूल्याङ्कन गरिएको छ।

सुरक्षाका हिसाबले ई–भिटारा आधुनिक प्रविधिले भरिपूर्ण देखिन्छ। नोभेम्बर २०२५ पछि उत्पादन गरिएका मोडलमा यात्रु सुरक्षालाई प्राथमिकता दिँदै ड्युअल फ्रन्ट एयरब्याग, साइड चेस्ट तथा टाउको जोगाउने एयरब्याग, साथै चालकका लागि घुँडा एयरब्याग समेत उपलब्ध छ । यसका अतिरिक्त, दुर्घटना रोकथामका लागि अटोमेटिक इमर्जेन्सी ब्रेक सिस्टम, लेन सपोर्ट सिस्टम तथा स्पिड साइन पहिचान गर्ने सुविधा जस्ता प्रविधि पनि समावेश गरिएको छ।

भारतीय बजारका लागि भने ई–भिटाराले अझ उत्कृष्ट प्रदर्शन गरेको छ। भारतमा सो गाडीले सेफ्टी परीक्षण कार्यक्रममा  पूर्ण ५ स्टार सेफ्टी मूल्याङ्कन हासिल गरेको छ। यही कारणले पनि सो गाडीलाई भारतीय उपभोक्ताले विशेष रुचि देखाएका छन् । साथै, ब्याट्री एज अ सर्भिससहितको विकल्पले यसलाई अझ सहज र व्यावहारिक बनाएको छ।

नयाँ ई–भिटारा दुई फरक ब्याट्री विकल्पमा उपलब्ध छ। पहिलो विकल्प ४९ किलोवाट आवर ब्याट्रीसहितको हो, जसले १४४ हर्स पावर र १८९ एनएमको टर्क उत्पादन गर्छ। सो भेरिएन्टले पूर्ण चार्जमा करिब ४४० किलोमिटर दूरी पार गर्न सक्छ। अर्को विकल्पमा ६१ किलोवाट आवरको ठूलो ब्याट्री प्याक उपलब्ध छ, जसले १७४ हर्स पावर उत्पादन गर्छ र समान टर्क प्रदान गर्छ । सो भेरिएन्टले एकपटक चार्जमा ५४३ किलोमिटरसम्मको दूरी पार गर्न सक्ने क्षमता राख्छ।