नेपालमा नयाँ बजाज पल्सर १५० को खुल्यो बुकिङ, मूल्य र फिचर यस्तो

काठमाडौं नेपालका लागि बजाजको आधिकारिक वितरक हंसराज हुलासचन्द एन्ड कम्पनीले नेपाली बजारका लागि नयाँ बजाज पल्सर १५० को बुकिङ खुला गरेको छ । भारतीय बजारमा केही महिना पहिले उपलब्ध सो बाइक नेपाली बजारका लागि भने अब उपलब्ध भएको हो ।

बजाज अटोले गत डिसेम्बर महिनामा नयाँ एलईडी लाइट र ग्राफिक्सका साथ अपडेट गरेको सो मोडल अब नेपालमा पनि उपलब्ध भएको हो । यसमा भएका एलईडी हेडलाइट र एलईडी टर्न ब्लिंकरले बाइकको सुन्दरता बढाउनुका साथै खराब मौसमको समयमा राइडिङ सुरक्षित गराउन भूमिका खेल्छन् । त्यसैगरी यसको नयाँ आकर्षक कलर र ग्राफिक्सले धेरैलाई लोभ्याउने बताइएको छ ।

त्यसैगरी यो बाइकमा सिंगल च्यानल एबीएस, फुल्ली डिजिटल कन्सोल लगायतका फिचर समेत रहेका छन् । यसमा पहिले जस्तै इन्धन ट्यांकी, क्लिप अन ह्याण्डलबार, स्प्लिट सिट, अलोय ह्विल र एक्जस्ट रहेको छ ।

बाइकमा पहिलेकै जस्तो १४९.५ सीसीको एफआई बीएस६ इन्जिन छ, जुन डीटीएस–आई टेक्नोलोजीयुक्त छ । यसले १४ पीएस पावर र १३.२५ एनएम टर्क जेनेरेट गर्छ ।

बजाज पल्सर नेपालमा पनि धेरै बिक्री हुने मोटरसाइकल हो । सन् २०१० पश्चात बजाज अटोले यो बाइकमा सबैभन्दा ठूलो परिमार्जका साथ यसलाई बजारमा ल्याएको बताइएको छ । भारतमा यसको मूल्य १ लाख ८ हजार भारु तोकिएको छ । नेपालमा यसको मूल्य ३ लाख ५५ हजार ९ सय रुपैयाँ तोकिएको छ ।