सिप्रदी र यात्री मिलेर बनाएको नयाँ स्कुटरको ७ हजार किलोमिटर परीक्षण, कहिले हुँदैछ लन्च ?

काठमाडौं– सिप्रदी र यात्री मिलेर नेपालमै उत्पादन गरेको विद्युतीय स्कुटर हाल नेपालका विभिन्न सडकहरुमा परिक्षण भइरेको छ । पी२ नामले लन्च हुने तयारीमा रहेको उक्त नयाँ विद्युतीय स्कुटरको ७ हजार किलोमटिर परीक्षण भएको कम्पनीले जनाएको छ ।

कम्पनीले आफ्नो फेसबुक पेजमार्फत उक्त स्कुटरको देशभरका विभिन्न सडक खण्डामा परिक्षण भइरेको जानकारी दिएको हो । स्कुटरलाई नेपालका विभिन्न कठिन भूभागहरु वालिङ, राम्दीघाट, भरतपुर, काठमाडौं, नुवाकोट, कुरी, हेटौँडा, जिरी, फापरबारी, मुलकोट र कटारीसम्मका सडकहरुमा गुडाएर परीक्षण गरिएको छ ।

तराईको समथर सडकदेखि मध्यपहाडी र अफरोड सेगमेन्टमा समेत यसको क्षमता जाँचिएको यात्रीले जनाएको छ । कम्पनीले यो स्कुटरलाई दैनिक ४ सय किलोमिटरभन्दा धेरै गुडाएर यसको टिकाउपन परीक्षण गरिरहेको छ ।

यात्री मोटरसाइकलले सिप्रदीसँगको सहकार्यमा स्कुटर प्रोजेक्ट अघि बढाएको थियो । त्यसअघि यात्रीले दुई मोटरसाइकल नेपालमै डिजाइन तथा उत्पादन गरेर बिक्रीमा ल्याइसकेको छ । सो नयाँ स्कुटरलाई कम्पनीले नेपाली नयाँ वर्षमा औपचारिक लन्च गर्ने योजना बनाएको छ ।