उत्पादन बृद्धि गर्ने योजनामा रोयल इनफिल्ड, वार्षिक क्षमता २० लाख पुग्ने

रोयल इनफिल्डले आफ्नो उत्पादन क्षमता २० लाख युनिट पु-याउने योजना बनाएको छ । उक्त योजना पुरा गर्न यसको मूल कम्पनी आइशर मोटर्सले ९ अर्ब ५८ करोड भारु लगानी स्वीकृत गरेको छ । कम्पनीसंग हाल वार्षिक १४ लाख ६० हजार युनिट मोटरसाइकल उत्पादन गर्ने क्षमता छ ।

कम्पनीले हाल आफ्नो पूर्ण क्षमतामा मोटरसाइकल उत्पादन गरिरहेको र माग बढ्दै जाँदा तमिलनाडुमा रहेको चेयर प्लान्टमा उत्पादन बढाउन खोजेको हो । प्लान्टको क्षमता बढाउने काम आर्थिक वर्ष २०२६–२७ को पहिलो त्रैमासिकमा सुरु हुनेछ जनाइएको छ ।

सो प्लान्ट आर्थिक वर्ष २०२७–२८ सम्ममा पूरा हुनेछ, जसले वार्षिक उत्पादन क्षमता ३७ प्रतिशत बढाउनेछ । घरेलु बजारसंगै विश्वभर रोयल इनफिल्ड मोटरसाइकलको माग उच्च दरमा बृद्धि भइरहेको छ ।

कम्पनीले २०२५ मा आफ्नो अहिलेसम्मकै उच्च बिक्री रेकर्ड हासिल गरेको छ । कम्पनीले १० लाख ७१ हजार ८०९ युनिट मोटरसाइकल बिक्री गर्दै पहिलो पटक १० लाख युनिटको माइलस्टोन पार गर्न सफल भएको छ । साथै, निर्यात समेत बढेर १ लाख ३२ हजार १३२ युनिट पुगेको जनाइएको छ ।