नेपाली बिक्रेतामार्फत भुटान पुग्यो क्रसफायर मोटरसाइकल, औपचारिक कारोबार सुरु

काठमाडौं–नेपालको अग्रणी तथा विश्वासिलो मोटरसाइकल ब्रान्ड क्रसफायरले भुटानमा आधिकारिक रूपमा आफ्नो उपस्थितिसँगै अन्तर्राष्ट्रिय बजारमा ऐतिहासिक उपलब्धि हासिल गरेको छ । जसलाई नेपालको बढ्दो अटोमोबाइल उद्योगका लागि विश्व मञ्चमा गर्वको छलाङका रूपमा हेरिएको छ ।

नेपालस्थित आधिकारिक विक्रेता क्लासिक ह्विल्स एक्सपोर्ट एन्ड इम्पोर्ट प्रालिले भुटानमा छट्टै कम्पनी खडा गरेर क्रसफायरको बिक्री थालेको हो ।

सन् २०१३ मा स्थापना भएदेखि एड्भेन्चर तथा अफ–रोड राइडर समुदायका लागि उच्च प्रदर्शनयुक्त मोटरसाइकलहरू प्रस्तुत गर्दै आएको क्रसफायरले सशक्त डिलर नेटवर्क, उत्पादन श्रृंखला विस्तार, मोटर स्पोट्र्स प्रवद्र्धन र राइडर समुदाय सशक्तीकरणमार्फत आफूलाई केवल ब्रान्ड नभई एक आन्दोलनका रूपमा स्थापित गरेको छ ।

भुटानको चुबाचुमा सम्पन्न उद्घाटन कार्यक्रममा आधिकारिक शोरूम सञ्चालन, नेपालका चर्चित स्टन्ट राइडर सरोज दा (हिडन नेपाल एक्सन) द्वारा रोमाञ्चक प्रदर्शन तथा भुटानी राइडरहरूका लागि उत्पादन प्रदर्शन र टेस्ट राइड अनुभव प्रदान गरिएको थियो, जहाँ उल्लेखनीय जनसहभागिता देखिएको थियो ।

भुटानमा क्रसफायर आरएमजेड २५० मोडलको बिक्री औपचारिक रूपमा सुरु भइसकेको कम्पनीले जाएको छ । निकट भविष्यमा विद्युतीय मोबिलिटीअन्तर्गत क्रसफायर ईभी र ग्यारो सहित थप उत्पादनहरू भुटानी बजारमा ल्याउने तयारी भइरहेको कम्पनीले जनाएको छ ।