राइड–हेलिङका लागि बीवाईडीले ल्यायो छुट्टै नयाँ ब्रान्ड, चारवटा मोडल लन्च हुँदै

न्यू ईनर्जी भेहिकलमा विश्व बजारलाई नेतृत्व गरिरहेको बीवाईडीले राइड–हेलिङका लागि छुट्ट्रै नयाँ ब्रान्ड ‘लिंघुई’ सार्बजनिक गरेको छ । बीवाईडीको पाँचौ ब्रान्डका रुपमा लन्च हुने तयारीमा रहेको सो नयाँ ब्रान्डले चीनको राइड–हेलिङ बजारमा क्रान्ति ल्याउने अपेक्षा गरिएको छ ।

बीवाईडीले हाल आफ्नो प्रमुख ब्रान्ड बीवाईडी सहित डेन्जा, फाङ चेङ बाओ र याङवाङ गरी कुल चारवटा ब्रान्डमा सवारीसाधन उत्पादन गर्दै आएको छ । नयाँ ब्रान्ड लिंघुई अन्तर्गत कम्पनीले ट्याक्सी र कर्पोरेट सवारी साधनहरू बेच्नमा ध्यान केन्द्रित गर्नेछ ।

सो नयाँ ब्रान्ड अन्तर्गतको लाइनअपले तीन ब्याट्री इलेक्ट्रिक सेडान र एक प्लग–इन हाइब्रिड मिनि भ्यान उत्पादन गर्ने जनाइएको छ । लाइनअपमा सबैभन्दा सस्तो कार ई५ हुने र उक्त मोडल बीवाईडी क्विन प्लस ईभी सेडानमा आधारित रहनेछ ।

त्यसैगरी, दोस्रो मोडल लिंघुई ई७ हुनेछ भने तेस्रो मोडल बीवाईडी हानमा आधारित ई९ रहने बताइएको छ । सूचीमा रहेको एक मात्र प्लग–इन–हाइब्रिड मोडल एम९ लाई भने कम्पनीले जिया मिनीभ्यानमा आधारित रहेर उत्पादन गर्न लागेको हो । सात सिट क्षमता भएको यस भ्यानमा १.५ लिटरको हाइब्रिड इन्जिन जडान गरिएको छ ।