ओसन सिरिजमा दुई नयाँ फ्ल्यागशिप मोडल ल्याउँदै बीवाईडी, टिजर सार्बजनिक

बीवाईडीले आफ्नो ओसन सिरिजमा दुई नयाँ मोडल थप्ने घोषणा गरेको छ । कम्पनीले हालै एक टिजर जारी गरी सिल ०८ र सिलियन ०८ मोडल थप गर्ने पुष्टि गरेको हो ।

यी दुई मोडलमध्ये सिल ०८ कम्पनीको फ्ल्यागशिप सेडान कार हुनेछ भने अर्को सिलियन ०८ पनि फ्ल्यागशिप एसयूभी मोडल हुनेछ । दुबै कार यसै वर्षको पहिलो त्रैमासिकमा चीनमा डेब्यू हुने अपेक्षा गरिएको छ ।

बीवाईडीले डिसेम्बर २०२५ मा आयोजित ओसन डेको अवसर पारेर ओशन ८ डुअल–फ्ल्यागशिप लाइनअप प्रस्तुत गर्ने घोषणा गरेको थियो । नयाँ मोडल आउने पक्कापक्कि भएपनि कम्पनीले हालसम्म यसको मूल्य निर्धारण, प्राविधिक विशिष्टताहरू र पावरट्रेनबारे कुनै जारनकारी बाहिर ल्याएको छैन ।

टिजरमा देखाइएको तस्विरअनुसार सिल ०८ एक विशाल कुपे स्टायलको सेडान कार हुने अनुमान गरिएको छ । त्यसैगरी, सिलियन ०८ लाई अधिक एंगुलल र अपराइट प्रोफाइलको साथ मध्यमदेखि ठूलो आकारको एसयूभीको रूपमा देखिन्छ ।

टिजरले भित्री लेआउट, ड्राइभट्रेन कन्फिगरेसन र प्लेटफर्म विवरणहरूबारे कुनै जानकारी सेयर नगरेपनि ओशन ८ सिरिज बीवाईडीको डाइनास्टि सिरिजबाट छुट्टै फ्ल्यागशिप लाइनको रूपमा सञ्चालन हुने अनुमान गरिएको छ । डाइनास्टि सिरिज अन्तर्गत बीवाईडीले फ्ल्यागशिप मोडलका रुपमा ट्याङ्ग९ एसयूभी र हान९ सेडान कार ल्याउने योजन बनाएको छ ।