होन्डाले सार्वजनिक गर्‍यो नयाँ ‘एच’ लोगो, २०२७ पछि आउने ईभी र हाइब्रिड मोडलमा प्रयोग हुने

जापानी अटोमोबाइल निर्माता कम्पनी होन्डाले आफ्नो अटोमोबाइल व्यवसायको नयाँ पहिचानका रूपमा नयाँ डिजाइनसहितको ‘एच’ मार्क (लोगो) सार्वजनिक गरेको छ। होन्डाले सन् १९६३ देखि प्रयोग गर्दै आएको एच मार्कलाई समयअनुसार परिमार्जन गर्दै आएको भए पनि यो पटकको परिवर्तनलाई कम्पनीले ऐतिहासिक र रणनीतिक महत्वको रूपमा लिएको छ।

नयाँ एच मार्क नेक्स्ट–जेनेरेशन विद्युतीय सवारी (ईभी) को विकाससँगै प्रस्तुत गरिएको हो। विशेषगरी होन्डा ० सिरिज सहितका नयाँ ईभीहरू “शून्यबाट नयाँ ईभी सिर्जना गर्ने” होन्डाको दृढ संकल्पको प्रतीकका रूपमा विकास भइरहेका छन्। यही दर्शनअनुसार होन्डाले आफ्नो लोगो डिजाइनलाई पनि पुनः परिभाषित गरेको जनाएको छ।

नयाँ डिजाइनलाई दुई हात फैलाएर स्वागत गरिरहेको आकृति जस्तै बनाइएको छ, जसले होन्डाले मोबिलिटीका सम्भावनाहरू विस्तार गर्ने र ग्राहकका आवश्यकतालाई इमान्दारीपूर्वक सेवा गर्ने प्रतिबद्धता झल्काउँछ। यसले होन्डा कम्पनीको रूपान्तरण, नवीन सोच र परम्परागत सीमाभन्दा बाहिर गएर नयाँ चुनौतीहरू स्वीकार गर्ने कर्पोरेट दृष्टिकोणलाई पनि प्रतिनिधित्व गर्दछ।

कम्पनीका अनुसार नयाँ एच मार्क सन् २०२७ र त्यसपछि बजारमा आउने नेक्स्ट–जेनेरेशन ईभी तथा हाइब्रिड इलेक्ट्रिक (एचईभी) मोडलहरूमा प्रयोग गरिनेछ। साथै, यो नयाँ लोगो सवारी साधनहरूमा मात्र सीमित नरही डिलरशिप, ब्रान्ड कम्युनिकेसन, तथा अटोमोबाइल मोटरस्पोर्ट्स गतिविधिहरू लगायत सम्पूर्ण अटोमोबाइल व्यवसायमा विस्तार गरिनेछ।

हाल अटोमोबाइल बजार विद्युतीकरण र इन्टेलिजेन्ट टेक्नोलोजीको तीव्र परिवर्तनको चरणमा रहेको उल्लेख गर्दै होन्डाले नयाँ एच मार्कलाई कम्पनीको “दोस्रो स्थापना” (Second Founding) को प्रतीकका रूपमा प्रस्तुत गरेको छ। यस अवधिमा होन्डाले परम्परागत सोच, अभ्यास र कार्यशैलीबाट मुक्त हुँदै अत्याधुनिक प्रविधि र नवीन विचारमार्फत ग्राहकको अपेक्षाभन्दा माथि जाने मूल्य प्रदान गर्ने लक्ष्य लिएको जनाएको छ।