होन्डाको नयाँ इलेक्ट्रिक स्कुटर भारतका लागि तयार हुँदै

होन्डाले भारतको इलेक्ट्रिक दुईपाङ्ग्रे बजारका लागि नयाँ इलेक्ट्रिक स्कुटर विकास गरिरहेको छ । यसले टीभीएस आइक्युब, बजाज चेतक र एथर रिजस्ता लोकप्रिय ब्रान्डहरूसँग प्रतिस्पर्धा गर्ने लक्ष्य राखिएको छ । कम्पनीले लागत घटाउन यस स्कुटरमा उच्च मात्रामा स्थानीय रूपमा उत्पादन गरिएका पार्टपुर्जाहरू प्रयोग गर्ने तयारी गरेको छ।

होन्डाले फेब्रुअरी २०२५ मा एक्टिभा ई र क्यूसी१ इलेक्ट्रिक स्कुटर लन्च गर्दै ईभी बजारमा प्रवेश गरेको थियो। तर अपेक्षाअनुसार बिक्री नबढेपछि केही महिनामै दुवै मोडलको उत्पादन अस्थायी रूपमा रोक्नुपरेको थियो। यी दुवै स्कुटर होन्डाका विश्वव्यापी मोडलमा आधारित थिए, जसलाई भारतीय बजारअनुसार परिमार्जन गरिएको थियो।

अब विकास भइरहेको नयाँ होन्डा इलेक्ट्रिक स्कुटर भने पूर्ण रूपमा भारतमै डिजाइन र विकास गरिनेछ। यसले अघिल्ला मोडलभन्दा फरक पहिचान पाउने र एक्टिभा ई तथा क्यूसी१ मा देखिएका कमजोरीहरू सुधार्ने कम्पनीको उद्देश्य रहेको छ।

होन्डा एक्टिभा ई भारतको एक मात्र इलेक्ट्रिक स्कुटर थियो जसमा घरमा चार्ज गर्ने सुविधा उपलब्ध थिएन। जसका कारणा यसले निकै आलोचना खेप्नु परेको थियो । होन्डाको ब्याट्री स्वापिङ स्टेशनमा निर्भर हुनुपर्थ्यो । साथै, एक्टिभा ई मा बुट स्पेस पनि कम थियो । यसको मूल्य पनि तुलनात्मक रूपमा उच्च थियो ।

तर अब भारतका लागि विकास भइरहेको नयाँ होन्डा इलेक्ट्रिक स्कुटरले यी सबै कमजोरीहरू समाधान गर्ने अपेक्षा गरिएको छ। यसमा ठूलो बुट स्पेस, राम्रो ड्राइभिङ रेन्ज, फास्ट चार्जिङ समय र प्रतिस्पर्धी ब्रान्डसरह आधुनिक सुविधाहरू उपलब्ध गराइने अनुमान गरिएको छ। स्थानीय उत्पादनका कारण यसको मूल्य पनि प्रतिस्पर्धी हुने अपेक्षा गरिएको छ। नयाँ होन्डा इलेक्ट्रिक स्कुटर २०२६ को अन्त्यसम्म भारतमा लन्च हुन सक्ने अनुमान गरिएको छ ।