भारतमा नयाँ सेल्टोसको उत्पादन सुरु, ७ दिनपछि लन्च हुँदै

दोस्रो पुस्ताको सेल्टोसलाई विश्व बजारका लागि सार्बजनिक गरेको केही समयपछि कियाले भारतमा यसको उत्पादन सुरु गरेको छ । नयाँ सेल्टोसलाई कियाको आन्ध्र प्रदेशस्थित अनन्तपुर प्लान्टमा उत्पादन थालिएको हो । एसयूभी आगामी जनवरी २ तारिखमा लन्च हुने र लगत्तै डेलिभरी थालिने किया मोटर्स इन्डियाले जनाएको छ ।

नयाँ र एकदमै बोल्ड डिजाइनमा आएको सेल्टोस प्राबिधिक रुपमा समेत भरिपूर्ण रहेको छ । के३ प्लेटफर्ममा आधारित नयाँ सेल्टोस हाल उपलब्ध मोडलको तुलनमा केही ठूलो छ भने ह्विलवेश समेत लामो छ । एसयूभीमा ब्रान्डको पछिल्लो टाइगर नोज ग्रिल दिइएको छ, जसले फ्रन्ट फेसियालाई झनै एग्रेसिभ बनाएको छ ।

कारमा नयाँ थ्री–स्पोक स्टेयरिङ ह्विल र डिजिटल इन्स्ट्रयुमेन्ट क्लस्टर र टचस्क्रिन इन्फोटेनमेन्ट प्रणालीका लागि डुअल १२.३–इन्च डिस्प्ले राखिएका छन् । ओभर–द–एयर अपडेटहरू प्राप्त गर्न सक्षम नयाँ सेल्टोसमा एआई एसिस्टेन्ट, हेड–अप डिस्प्ले र ड्राइभर एसिस्टेन्स प्रविधि समेत सामेल गरिएको छ ।

नयाँ जेनेरेसनको सेल्टोस बजार अनुसार विभिन्न इन्जिनहरूमा उपलब्ध हुनेछ । कियाले १.६ लिटर टर्बो पेट्रोल र २.० लिटर प्राकृतिक रूपमा एस्पिरेटेड पेट्रोल इन्जिन उपलब्ध गराउने जनाएको छ । साथै भेइकल–टु–लोड र रिजेनेरिटिभ ब्रेकिङ सहितको हाइब्रिड पावरट्रेनमा समेत आउने अपेक्षा गरिएको छ ।

भारतमा, सेल्टोस १.५ लिटर नेचुरल्ली एस्पिरेटेड पेट्रोल, १.५–लिटर टर्बो पेट्रोल र १.५ लिटर डिजेल इन्जिन विकल्पमा उपलब्ध रहँदै आएको छ । ट्रान्समिसन विकल्पहरूमा म्यानुअल, आईएमटी, सिभिटी र टर्क–कन्भर्टर अटोमेटिक समावेश हुनेछन् ।