केटीएममाथि बजाजको अब पूर्ण नियन्त्रण, ८० करोड युरोमा शतप्रतिशत सेयर खरिद

बजाज अटोले केटीएममा पूर्ण नियन्त्रण कायम गरेको छ । कम्पनीले अस्ट्रियाली बाइक निर्मातालाई ८० करोड युरोमा खरिद गरेको हो ।

केटीएमको होल्डिङ कम्पनी पिएरे बजाज एजी(पीबीएजी) लाई पूर्ण रुपमा आफू मातहत लिएपछि बजाजले केटीएमको संरचनालाई नै परिवर्तन गर्न थालेको छ ।

भारतीय धितोपत्र तथा विनिमय बोर्ड अन्तर्गतको नियामक फाइलिङमा बजाज अटोले पुष्टि गरे अनुसार कम्पनीले नोभेम्बर १८, २०२५ मा सो डिल सम्पन्न गरेको हो । जसमा यसको सहायक कम्पनी बजाज अटो इन्टरनेशनल होल्डिंग्सले सम्पूर्ण ५० हजार १०० कित्ता सेयर खरिद गरेको थियो ।

अधिग्रहण पूरा भएपछि, बजाजले कम्पनी भित्र संगठनात्मक परिवर्तनहरू गर्न थालेको छ । पीबीएजीको नाम बजाज अटो इन्टरनेशनल होल्डिंग्स एजी राखिनेछ, र पीएमएजीको नाम बजाज मोबिलिटी एजी राखिनेछ ।

यससँगै बजाजले नयाँ होल्डिंग्स कम्पनीको ब्यवस्थापनलाई समेत पुनर्संरचना गर्न सुरु गरिसकेको छ ।