महिन्द्राले नयाँ इलेक्ट्रिक एसयूभी एक्सईभी ९एस चाँडै लन्च गर्ने, टिजर सार्वजनिक

महिन्द्राले नयाँ इलेक्ट्रिक एसयूभी ल्याउने तयारी पूरा गरेको छ। कम्पनीले चाँडै नै महिन्द्रा एक्सईभी ९एस लन्च गर्ने घोषणा गरिसकेको छ। कम्पनीले यसको एउटा टिजर पनि जारी गरेको छ, जसले एसयूभीको डिजाइन र सुविधाबारे महत्वपूर्ण संकेत दिएको छ।

महिन्द्राले आफ्नो इलेक्ट्रिक सवारी लाइनअपको विस्तारसहित सो नयाँ मोडल प्रस्तुत गर्न लागेको हो। रिपोर्टका अनुसार एक्सईभी ९एसको डिजाइन एक्सईभी ९ई भन्दा प्रिमियम र आधुनिक हुनेछ। यसमा प्यानोरामिक सनरुफ, आकर्षक एलईडी डिआरएलसहितको एलईडी हेडलाइट र शार्क फिन एन्टेनाजस्ता आधुनिक फिचर समावेश हुनेछ ।

रिपोर्टअनुसार महिन्द्रा एक्सईभी ९एस दुई छुट्टाछुट्टै ब्याट्री प्याकसहित आउनेछ । पहिलो ५९ किलोवाट क्षमताको ब्याट्रीले करिब ५४२ किलोमिटरसम्मको रेन्ज प्रदान गर्न सक्ने अनुमान गरिएको छ। दोस्रो, ७९ किलोवाट ब्याट्री प्याकले ६५६ किलोमिटरसम्म यात्रा गर्न सक्नेछ ।

महिन्द्राले भारतीय बजारमा सो नयाँ इलेक्ट्रिक एसयूभीलाई नोभेम्बर २७ मा आधिकारिक रूपमा प्रस्तुत गर्ने घोषणा गरिसकेको छ। कम्पनीको विद्यमान इलेक्ट्रिक मोडलहरूमा यो सबैभन्दा उच्च श्रेणीमा रहने विश्वास गरिएको छ।