नवरात्रमा मारुती सुजुकीको ४ दिनमै ८० हजार कार बिक्री

चाडपर्वको मौसम र हालै भएको जीएसटी दर कटौतीले भारतको कार बजारमा ठूलो उछाल ल्याएको छ। मारुती सुजुकीले नवरात्र २०२५ को पहिलो चार दिनमै भारतभर ८० हजारभन्दा बढी कार बिक्री गरी नयाँ कीर्तिमान कायम गरेको छ।

नयाँ लागू गरिएको जीएसटी २.० ले कार मूल्यमा उल्लेखनीय गिरावट ल्याएपछि ग्राहकहरूको चासो एकाएक बढेको हो। पहिले २८ प्रतिशत जीएसटी लाग्ने १२०० सीसीसम्मका इन्जिन भएको साना कारमा अब मात्र १८ प्रतिशत जीएसटी लाग्ने व्यवस्था भएपछि मारुती सुजुकीको धेरै मोडलहरू सस्तो भएको छ । जस्तै मारुतीको सबैभन्दा किफायती कार एस-प्रेसो करिब १ लाख ३० हजार भारुसम्म सस्तो भएको छ।

यही कारण नवरात्रको पहिलो दिनमै मारुती सुजुकीले ३० हजार कार बिक्री गर्न सफल भयो । त्यसपछि लगातार बढ्दो मागका कारण कम्पनीले चार दिनमै ८० हजार कार बिक्री गरेको घोषणा गरेको छ। कम्पनीका अनुसार दैनिक रुपमा ८० हजारभन्दा बढी ग्राहकले मारुती सुजुकीका कारबारे जानकारी लिने गरेका छन् । साथै ग्राहकहरूको रोजाइमा इन्ट्री लेभल कार बलेनो, डिजायर, ब्रेजा र एर्टिगा जस्ता लोकप्रिय मोडल पनि परेका छन् ।  

मारुती सुजुकीले हाल भारतीय बजारमा २३ मोडल बिक्री गर्दै आएको छ, जसमा ९ ह्याचब्याक, ३ सेडान, ५ एसयूभी, ४ एमपीभी र २ मिनीभ्यान छन् । यी कारहरूको मूल्य ३ लाख ५० हजारदेखि सुरु भएर २८ लाख ६१ हजार भारुसम्म पर्छ।