कस्तो छ सुजुकीको नयाँ एसयूभी भिक्टोरिस ? प्रतिस्पर्धी कुन ? फिचर के ?

मारुती सुजुकीले नयाँ एसयूभी भिक्टोरिस लन्च गरेको छ । भारत एनक्यापबाट ५ स्टार सेफ्टी रेटिङ प्राप्त गरेको सो गाडी कम्पनीले चाँडै बिक्रीमा ल्याउने तयारी गरेको छ। यसको मूल्य करिब १० देखि १५ लाख भारु हुने अनुमान गरिएको छ ।

भिक्टोरिसले हुन्डाई क्रेटा, किया सेल्टोस, टोयोटा हाइराइडर, होन्डा एलिभेट, स्कोडा कुशाक र फक्सवागन टिगुआन जस्ता ४.३ मिटर खण्डका एसयूभीहरूसँग प्रतिस्पर्धा गर्नेछ। लुक्सका हिसाबले यो ग्रान्ड भिटारासँग धेरै मिल्दोजुल्दो देखिन्छ । एलईडी लाइट, कनेक्टिङ लाइट बार र नयाँ अलोय ह्विलले गाडीलाई स्पोर्टी स्वरूप प्रदान गरेको छ ।

भिक्टोरिसमा धेरै नयाँ फिचर समावेश गरिएको छ। लेभल २ एडभान्स ड्राइभर असिस्ट सिस्टम, डल्बी एटमस अडियो सिस्टम, पावर्ड टेलगेट, भेन्टिलेटेड फ्रन्ट सिट, १०.२५ इन्च स्मार्टप्ले प्रो प्लस इन्फोटेनमेन्ट सिस्टम, एम्बियन्ट लाइटिङ, ७ इन्च डिजिटल ड्राइभर डिस्प्ले, सुजुकी कनेक्ट, वायरलेस स्मार्टफोन कनेक्टिभिटी, हेड अप डिस्प्ले, वायरलेस चार्जर, ३६० डिग्री क्यामेरा, टायर प्रेसर मोनिटरिङ सिस्टम, क्रुज कन्ट्रोल र ६ एयरब्यागजस्ता फिचर यसमा रहेको छ ।

मारुती सुजुकी भिक्टोरिस विभिन्न ट्रिममा उपलब्ध हुनेछ । यसमा तीन प्रकारका इन्जिन विकल्प दिइएको छ। १.५ लिटर पेट्रोल इन्जिनले १०३ बीएचपी पावर र १३९ एनएम टर्क उत्पादन गर्नेछ, जसमा ५ स्पिड म्यानुअल र ६ स्पिड अटोमेटिक गियरबक्स उपलब्ध हुनेछ। यसको माइलेज २०.६ देखि २१.१ किलोमिटर प्रतिलिटर रहनेछ।

त्यसैगरी, १.५ लिटर हाइब्रिड इन्जिनले ११६ बीएचपी पावर र १४१ एनएम टर्क प्रदान गर्नेछ। यसमा ई-सीभीटी गियरबक्स रहनेछ र माइलेज २७.९७ किलोमिटर प्रतिलिटरसम्म हुने कम्पनीले दाबी गरेको छ। सीएनजी भेरिएन्टले ८८ बीएचपी पावर र १२२ एनएम टर्क प्रदान गर्नेछ, जसमा ५ स्पिड म्यानुअल गियरबक्स रहनेछ र २६.६ किलोमिटर प्रतिलिटर माइलेज दिनेछ । थप बुट स्पेसको सुविधा दिन सीएनजी भेरिएन्टमा अन्डर बडी ट्याङ्की राखिएको छ।