मर्सिडिज बेन्जले निसान छोड्यो, ३२५ मिलियन डलरमा सम्पूर्ण हिस्सा बिक्री

मर्सिडिज बेन्जले निसान मोटरमा रहेको आफ्नो ३.८ प्रतिशत हिस्सा बिक्री गरेको छ । कम्पनीले प्रति शेयर ३४१.३ येनमा बिक्री गरेको थियो । शेयर बिक्रीपछि निसानको शेयर मूल्य पनि सोही दिन झण्डै ६ प्रतिशतले घटेको थियो ।

निसान लामो समयदेखि संकटमा थियो । रेनो–निसान–मित्सुबिशी गठबन्धनको प्रमुख हिस्सा बनेको सो कम्पनी कार्लोस घोसनको नेतृत्वमा विश्वव्यापी रूपमा विस्तार भएको थियो। तर, २०१८ मा घोसनमाथि गम्भीर आरोप लागेपछि र उनको पदत्यागपछि गठबन्धन कमजोर हुँदै गयो। त्यसयता निसानले बिक्रीमा गिरावट, बजार हिस्सामा कमी र ठूलो खर्च कटौतीको चुनौती भोग्दै आएको छ।

यसै वर्ष रेनोले पनि निसानमा आफ्नो हिस्सेदारी १५ प्रतिशतबाट घटाएर १० प्रतिशतमा झारेको छ । हालै मात्र निसानले अप्रिल–जुन २०२५ अवधिमा ५३५ मिलियन डलर घाटा बेहोरेको रिपोर्ट गरेको छ। कम्पनीको बजार मूल्य अब १० अर्ब डलरभन्दा तल झरेको छ ।

नयाँ सीईओ इभान एस्पिनोसाले अप्रिल २०२५ मा पदभार ग्रहण गर्दै ठूला संरचनात्मक परिवर्तनहरूको घोषणा गरेका छन्। कम्पनीले आफ्नो वार्षिक उत्पादन क्षमता ३५ लाखबाट घटाएर २५ लाख युनिटमा सीमित गर्ने र २०२७ सम्म विश्वव्यापी एसेम्बली प्लान्टको संख्या १७ बाट घटाएर १० मात्र राख्ने निर्णय गरेको छ।

निसान अहिले दोहोरो चुनौतीको सामना गरिरहेको छ । अघिल्ला गल्तीहरूबाट पुनः उठ्ने संघर्ष र विश्वव्यापी प्रतिस्पर्धीहरूसँग टिक्ने चुनौती। एकातिर चिनियाँ ईभी कम्पनीले द्रुत रूपमा बजार कब्जा गरिरहेका छन् भने अर्कोतर्फ अमेरिकी कम्पनीहरू नाफामा केन्द्रित भइरहेका छन्।