नाडा अटो शोमा नामी ०६ सार्वजनिक

काठमाडौ– भृकुटीमण्डपमा आजदेखी सुरु नाडा अटो शो २०२५ मा नामीको विद्युतीय एसयूभी सार्वजनिक गरिएको छ । डोङफेङ नामीको नेपालका लागि आधिकारिक वितरक एमएडब्लु वृद्धिले आफ्नो वहुप्रतिक्षित विद्युतीय एसयूभी नामी०६ लन्च गरेको हो । यसअघि ह्यचाब्याक कार नामी०१ भित्र्याएर ईभी पारखीको विश्वास जितेको कम्पनीले एसयूभी सेग्मेन्टमा पहिलोपटक नामी०६ लन्च गरेको हो ।

नामी भिगो समेत भनिने नामी ०६ दुई भेरिएन्टमा उपलब्ध हुनेछ । त्यसमध्ये नामी ई२ भेरिएन्टको मूल्य ३७ लाख ९९ हजार र ई२ प्लसको मूल्य ४० लाख ९९ हजार रुपैयाँ तोकिएको छ । नाडा अटो शोका लागि यो विशेष मूल्य उपलब्ध गराइएको हो ।

डोङफेङको क्वान्टम आर्किटेक्चर ३ प्लेटफर्ममा बनेको यस नयाँ कारको क्याबिनमा मिनिमल डिजाइन स्टाइल दिइएको छ । कारमा १२.८ इन्चको टचस्क्रीन इन्फोटेन्मेन्ट सिस्टम र ८.८ इन्चको इन्स्ट्रुमेन्ट क्लस्टर राखिएको छ । साथै, प्यानारोमिक सनरुफ, एम्बियन्ट लाइट, ६ वटा स्पीकर, हिटेड भेन्टिलेटेड र मसाज सिट समेत पाउन सकिन्छ ।

कारमा ४४.९४ किलोवाट आवर र ५१.८७ किलोवाट आवर ब्याट्री प्याकको अप्सन दिइएको छ भने मोटर क्षमता ९९ किलोवाट छ । यस एसयूभीमा रहेको ब्याट्रीलाई ७ किलोवाटको एसी चार्जर र ६० किलोवाटको डीसी फास्ट चार्जरले चार्ज गर्न सकिन्छ । डब्लुएलटिपीका अनुसार यस एसयूभीको रेन्ज ३०० र ३५० किलोमिटर छ ।

कम्पनीले आफ्ना निकटतम प्रतिस्पर्धीलाई आधार मानेर नयाँ मूल्य निर्धारण गरेको छ । नामी ०६ ले नेपाली बजारमा बीवाईडी एट्टो२, एमजी एस५, हुन्डाई क्रेटा र फरथिङ फ्राइडे एसयूभी लगायतसँग प्रतिस्पर्धा गर्नुपर्ने छ ।