नाइमा नेपाल मोबिलिटी एक्सपाे २०२५ भव्य रुपमा सम्पन्न, १ लाख बढीले गरे अवलोकन

काठमाडौं - नेपाल अटोमोबाइल इम्पोर्टर्स एन्ड म्यानुफ्याक्चर्स एसाेसिएसन (नाइमा)को आयोजनामा काठमाडाैंकाे भृकुटीमण्डपमा ६ दिन चलेकाे पहिलो संस्करणको ‘नाइमा नेपाल मोबिलिटी एक्सपाे २०२५’ भव्य रुपमा सम्पन्न भएकाे छ ।

आइतबारसम्मलाई तय भएको मोबिलिटी एक्सपाेमा अवलोकनकर्ताको उत्साहजनक सहभागिता भएपछि आयोजक नाइमाले एक दिन थपेर सोमबारसम्म प्रदर्शनी तय गरेको थियाे । मोबिलिटी क्षेत्रमा नेपालकै ठूलो एक्सपाे दाबी गरिएको साे एक्सपाेमा अटाेप्रेमीहरुकाे घुइँचाे नै लागेकाे थियाे । एक्सपाे एक लाख बढीले अवलाेकन गरेकाे नाइमा अध्यक्ष रितुसिंह वैद्यले बताइन् ।

एक्सपाे अवधिभर २ हजार ५ सयभन्दा बढी गाडी बुकिङ भएको उनले जानकारी दिइन्। 

वैद्यले भनिन्, ‘यसपटकको पहिलो एक्सपाे भव्य रुपमा सम्पन्न भयो। एक्सपाेमा १ लाख अवलोकनकर्ता आउनुभयो। सो क्रममा करिब २५ सय गाडी बुकिङ भएको छ।’

एक्सपाेमा सर्वसाधरणका साथै बरिष्ठ कलाकार, कुटनीतिक नियोगका कर्मचारीहरु, सरकारी तथा गैरसरकारी संस्थाका व्यक्तिहरु, व्यापारी साथीहरु लगायत समाजका सबै तहका व्यक्तिहरुले उपस्थिति जनाएका थिए ।

५० भन्दा बढी ब्रान्डका सवारीसाधनहरू, आकर्षक छुट, र सडक सुरक्षा जस्ता महत्त्वपूर्ण छलफलहरूले यो एक्सपाेलाई नवप्रवर्तन र जागरूकताको उत्कृष्ट मञ्च बनाएको थियाे । एक्सपाेमा दुईपांग्रे, चारपांग्रे, र व्यावसायिक सवारीसाधनका नयाँ मोडलहरू समावेश थिए, जहाँ दर्जनाैं नयाँ माेडलहरु लन्च भएका थिए ।

एक्सपाेमा १८ लाखदेखि ३ करोड रुपैयाँभन्दा माथिका गाडी तथा बाइकहरू प्रदर्शनीमा राखिएको थियो । विशेषगरी विद्युतीय सवारी ईभीले अवलोकनकर्ताको ध्यान तानेको थियाे । र बुकिङ पनि उत्साहपूर्ण भएकाे आयोजककाे दाबी छ ।