थापाथली क्याम्पसले कीर्तिपुरमा चार्जिङ स्टेसन बनाउने

काठमाडौं – त्रिभुवन विश्वविद्यालय अन्तर्गतको थापाथली क्याम्पसले कीर्तिपुरमा इलेक्ट्रिक सवारी साधन चार्जिङका लागि आवश्यक चार्जिङ स्टेसन निर्माण गर्ने भएको छ । हाल काठमाडौंको थापाथलीमा अवस्थित सो क्याम्पस कीर्तिपुरमा स्थानान्तरण हुने भएको र त्यही नै चार्जिङ स्टेसन समेत निर्माण गरिने भएको हो ।

काठमाडौंमा हिजो सम्पन्न ‘पोलिसी डायलग अन अटोमोबाइल एन्ड बेटर मोबिलिटी’ विषयको अन्तरक्रिया कार्यक्रममा थापाथली क्याम्पसका असिस्टेन्ट प्रोफेसर लोचन केन्द्र देवकोटाले सो जानकारी दिए ।

नेपाल विद्युत प्राधिकरणको सहकार्यमा निर्माण गरिने सो चार्जिङ स्टेसन स्थापनाका लागि आवश्यक कार्य अगाडि बढेको छ । पहिलो चरणमा करिव ५० चार्जिङ स्टेसन निर्माण गरिने बताइएको छ । यस अनुसार पहिलो १२ स्टेसन निर्माणको कार्य छिट्टै नै सुरु हुनेछ ।

थापाथली क्याम्पसले हाल अटोमोबाइल र मोबिलिटीका लागि विभिन्न कार्य गरिरहेको र भविष्यमा समेत यसलाई निरन्तरता दिइने उनले बताए ।

सो अवसरमा क्याम्पसले गरिरहेको विभिन्न कार्यका वारेमा उनले जानकारीमूलक सामग्री प्रस्तुत गरेका थिए ।

नेपाल अटोमोबाइल्स एसोसिएसन (नासा नेपाल) को आयोजनामा देश विदेशका प्रतिष्ठित व्यक्तित्वहरुको सहभागितामा पोलिसी डायलग अन अटोमोबाइल एन्ड बेटर मोबिलिटी २०२५ दुई दिन गरी हिजो सम्पन्न भएको थियो ।