यामाहा एफजेडएक्स हाइब्रिडको २०२५ संस्करण सार्बजनिक, मूल्य कति ?

यामाहाले आफ्नो लोकप्रिय मोटरसाइकल एफजेडएक्स हाइब्रिडको २०२५ संस्करण लन्च गरेको छ । १ लाख ५० हजार भारु मूल्य तोकिएको यस मोटरसाइकलमा अब टर्न–बाई–टर्न नेभिगेसनको साथ कलर टिएफटी इन्स्ट्रुमेन्ट कन्सोल जस्ता नयाँ फिचर राखिएको छ ।

बाइकमा गोलाकार हेडल्याम्प, उठेको ह्यान्डलबार र सिंगल–पीस स्टेप्ड सिट सहितको पुरानै नियो–रेट्रो डिजाइन पाउन सकिन्छ । दुबै चक्कामा अलोय ह्विल जडान गरिएको सो नयाँ संस्करणमा यामाहाले ४.२ इन्चको टिएफटी डिस्प्ले उपलब्ध गराएको छ, जसले वाई कनेक्ट एपमार्फत स्मार्टफोन कनेक्टिभिटीलाई सपोर्ट गर्दछ । इनबिल्ट गुगल म्याप उपलब्ध यस बाइकले रियल–टाइम–डाइरेक्सन, नेभिगेसन इन्डेक्स, इन्टरसेक्सन डिटेल्स र सडकको नाम समेत प्रदान गर्दछ ।

बाइकमा १४९ सीसी, सिंगल–सिलिन्डर, एयर–कूल्ड, फ्युल–इन्जेक्टेड इन्जिन जडान गरिएको छ, जसले ७,२५० आरपीएममा १२.२ बीएचपी र ५,५०० आरपीएममा १३.३ एनएम टर्क जेनेरेट गर्दछ । इन्जिनलाई ५–स्पीड गियरबक्समा जोडिएको छ ।

सस्पेन्सन सेटअपको कुरा गर्नुपर्दा एफजेडएक्समा टेलिस्कोपिक फ्रन्ट फोर्क र पछाडि ७–स्टेप एड्जस्टेवल मोनो–शक समावेश गरिएको छ । सुरक्षाका लागि बाइकको दुबै चक्कामा डिस्क ब्रेक सहित सिंगल च्यान एबिएस राखिएको छ । साथै यसमा ट्रयाक्सन कन्ट्रोल सिस्टम समेत पाउन सकिन्छ ।